Ósimdik tuqymy aınalymyn baqylaıtyn aqparat júıesi engiziledi

ASTANA. QazAqparat – Elimizde ósimdik tuqymy aınalymyn baqylaıtyn aqparat júıesi engiziledi, dep habarlaıdy QazAqparat tilshisi.

Senat depýtattarynyń saýalyna joldaǵan jaýabynda Premer-Mınıstr Álıhan Smaıylov osyndaı málimet keltiredi.

«Agroónerkásipti damytýdyń 2021-2030 jyldarǵa arnalǵan turjyrymdamasyn iske asyrýdyń jospary aıasynda Selektsııalyq jetistikterdiń memlekettik tizilimin júrgizýdi usyný formatynan ruqsat berý (shekteý) sıpatyna reglamentteý máselesi pysyqtalyp jatyr», - dep jazady Úkimet basshysy.

Onyń aıtýynsha, el aýmaǵyna kirip-shyǵatyn tuqym materıalynyń aınalymyn baqylaý kúsheıtilmek. Ol úshin arnaıy aqparat júıesi qurylady.

«Sondaı-aq, Aýyl sharýashylyǵy mınıstrligi tuqym aınalymyn baqylaıtyn aqparat júıesin quryp, engizýdi kózdep otyr. Bul tuqym aınalymyn baqylaýdyń tıimdi quraldarynyń biri bolmaq», - delingen Premer-Mınıstr jaýabynda.