Ósimdik resýrstaryn kommertsııalyq maqsatta paıdalanǵandar aqy tóleıdi
«Ósimdikter dúnıesin jalpy paıdalaný (jeke jáne úıde paıdalaný úshin aqysyz) jáne arnaıy paıdalaný (kommertsııalyq) tártibimen júzege asyrylatyn bolady. Oblystardyń, respýblıkalyq mańyzy bar qalalardyń jáne astananyń jergilikti ókiletti organynyń sheshimimen bekitilgen lımıtterde jeke tulǵalar jabaıy jemisterdi, jańǵaqtardy, sańyraýqulaqtardy, jıdekterdi, dárilik shıkizatty jáne basqa da ósimdik resýrstaryn óz qajetine óteýsiz jınaýǵa quqyǵy bar. Jınaý normasy ósimdik dúnıesi men geobotanıkalyq materıaldardy túgendeý jáne resýrstyq zertteý negizinde anyqtalady», - dedi E. Qutpanbaev Ortalyq kommýnıkatsııalar qyzmetindegi baspasóz máslıhatynda.
Sonymen qatar ol 2024 jylǵy 1 qańtardan bastap ósimdikter dúnıesin arnaıy tártipte paıdalanǵandarǵa (kommertsııalyq) resýrstar aqyly bolatynyn aıtty.
«Tólem mólsheri osy resýrstardyń tabıǵı qory, taralýy, qundylyǵy, resýrstardyń ónimdiligin eskere otyryp belgilenedi. Ósimdikter dúnıesin jeke maqsatta paıdalaný tegin bolady», - dedi komıtet ókili.
Budan buryn habarlanǵandaı, bıyl 2 qańtar kúni Memleket basshysy «Ósimdikter dúnıesi týraly» Qazaqstan Respýblıkasynyń Zańyna qol qoıdy.
Jaqynda QR Premer-Mınıstriniń orynbasary – Qarjy mınıstri Erulan Jamaýbaev sańyraýqulaq pen jemis-jıdek teretinderge salyq salýdyń jańa normasyna qatysty túsinik berdi. 2024 jyldan bastap elimizde sańyraýqulaq pen jıdek tergeni úshin keıbir azamattarǵa salyq qarastyrylǵan.
«Mundaı alym túri buryn da bolǵan. Osyǵan deıin buryn osy talap tek erekshe qorǵalatyn aımaqtarda, ıaǵnı ulttyq park, qoryqtardyń aýmaǵynda taralǵan edi. Al endi barlyq jerde qoldanylmaq. Ekinshiden, jańa normanyń qarapaıym halyqqa qatysy joq. Bul turǵyda salyq ónimdi kóp kólemde jınaıtyn, dárilik preparattar jasaıtyn nemese kommertsııalyq maqsatta paıdalanatyn kásipkerlerge qatysty», - dedi E. Jamaýbaev.
Qazaqstanda 1,5 myńǵa jýyq dárilik ósimdik bar.
