Osyǵan deıin 4 adam mert bolǵan nóser jaýynnan Ońtústik Koreıaǵa taǵy da qaýip tóndi

ASTANA. KAZINFORM – Ońtústik Koreıada úsh kún qatarynan jaýǵan nóser jaýyn saldarynan 4 adam mert boldy. Taǵy 1 adam iz-túzsiz joǵalyp, 5 myń adam evakýatsııalandy.

Bul týraly juma kúni resmı organdar málim etti. Al meteorologııalyq qyzmet el boıynsha taǵy da mol kólemde nóser jańbyr jaýýy múmkin ekenin aıtty, dep jazady Yonhap.

Tabıǵı apattarmen jáne qaýipsizdik sharalarymen jumys jónindegi ortalyq shtab málimetteri boıynsha, eldiń ortalyq jáne ońtústik óńirlerine túsken nóser jaýyn saldarynan bolǵan tabıǵı apat qurbandary kóbine Ońtústik Chhýnchhonda tirkelgen.

Bılik ókilderiniń habarlaýynsha, juma kúni tańǵy saǵat 6-00-degi málimetter boıynsha, 13 qala men provıntsııadan 5192 adam baspanalaryn tastap shyqqan.

Barlyǵy 496 qoǵamdyq, 276 jeke múlik búlingeni anyqtaldy. Olardyń ishinde 328 joldy sý basý, 30 ózen dambalarynyń buzylý jaǵdaılary bar.

Jolaýshylar paromynyń eki baǵytynda qozǵalys toqtatylsa, 8 baǵyt boıynsha poıyzdar júrmeıtin boldy.

Barlyǵy 45 ret jaryq sóndirý jaǵdaılary tirkelip, olardyń 36-sy juma kúni azańmen qalpyna keltirildi. Ózgeleri boıynsha tıisti jumystary jalǵasyp jatyr.

Osyǵan deıin Ońtústik Koreıada nóser saldarynan eki adam qaza taýyp, myńǵa jýyq turǵyn kóshirilgenin jazǵan edik.