Osydan 51 jyl buryn Rýbık teksheleri paıda boldy

ASTANA. KAZINFORM — Búgin álem boıynsha Rýbık teksheleriniń týǵan kúni. Logıka, shydamdylyq pen este saqtaý qabiletin damytatyn oıynshyq osydan 51 jyl buryn Majarstanda paıda bolǵan. Qazir álemde onyń 450 mıllıonnan astam danasy satylady. Al búgin «Búgin LIVE» stýdııasynda rýbık tekshelerin jınaýdy hobbıge aınaldyrǵan zııatker jastar qonaq boldy. 

— Men spıdkýbıngpen 10 jyl boıy aınalysyp kele jatyrmyn. Maǵan alǵash ret Rýbık tekshelerin anam satyp aldy. Ony alǵash ret qolyma alǵanda, muny sheshý múmkin emes dep oıladym. Biraq qyzyǵýshylyǵym jeńip, kún saıyn jattyǵa bastadym. Qazir Rýbık tekshelerin jınaýdan jeke rekordym — 3,61 sekýnd, — deıdi Álisher Qurmash.

Spıdkýber búginde Nazarbaev ýnıversıtetiniń 1-kýrs stýdenti. Ol túrli jarystarǵa qatysyp, baǵyn synap kórip júr.

— Qazaqstanda spıdkýbıng qarqyndy damyǵan. Jastar túrli týrnırlerge belsendi qatysady. Biraq spıdkýbıng tek qana 3×3 ólshemdi klassıkalyq túrimen ǵana shektelmeıdi. Resmı jarystarda 17 túrli rýbık teksheleri bolady. Eń ońaıy — 2×2, — deıdi stýdent.

Álisher Qurmash klassıkalyq Rýbık tekshelerin tez ári durys jınaýdyń tehnıkasymen bólisti.

— Árbir Rýbık tekshelerin durys jınaýdyń ózindik algorıtmderi bar. Eń birinshi qadam — qosý belgisin jınaý. Keıin aq tústerdi, sodan soń ekinshi betin bitiremiz. Keıin úshinshi tústi bitirip, bir algorıtmmen Rýbıkti tolyqtaı jınaımyz, — deıdi ol.

Rýbık tekshelerin jyldamdyqqa jınaýdy hobbıine aınaldyrǵan taǵy bir stýdııa qonaǵy — Aıdar Nádir. Spıdkýber klassıkalyq Rýbık basqatyrǵyshyn eń jyldam 5,69 sekýndta jınaǵan.

— Men spıdkýbıngpen 7 jasymnan beri aınalysamyn. Qazir bul hobbımen aınalysyp júrgenime 8 jyl boldy. Oǵan meniń aǵam sebep boldy. Qazirgi tańda men saǵat tildi Rýbık basqatyrǵyshyn jınaý boıynsha Qazaqstandyq rekord ıegerimin. Ortasha ýaqyt — 5,48 sekýnd. Al jeke úıdegi rekordym — 2,5 sekýnd, — deıdi spıdkýber.

Aıta keteıik, dál osy basqatyrǵyshty jınaý boıynsha jańa álemdik rekordty Qytaılyq 11 jasar Ihen Van ornatqan. Ol Rýbık tekshelerin nebári 3,081 sekýndta qurastyryp, burynǵy rekordty jańartty. Aldyńǵy jetistik 21 jastaǵy amerıkalyq Maks Parkte bolǵan, ol 2023 jyly kýbıkti 3,13 sekýndta jınaǵan edi. 

Aıta ketelik topaı asyq jınaǵan aqtóbelik Qazaqstan rekordtar kitabyna engen edi.