Osy jyly kóktemgi egin egýge qansha qarajat bólindi
ASTANA. KAZINFORM — «Damý» qory arqyly beriletin kepildikter boıynsha nesıe kólemin 300 mlrd teńgege deıin jetkizildi. Bul týraly Úkimet otyrysynda Aýyl sharýashylyǵy mınıstri Aıdarbek Saparov málim etti.
— Osy jyly kóktemgi dala jáne egin jınaý jumystaryna jeńildetilgen kredıt berýge 700 mlrd teńge (2025 jyl — 649,3 mlrd teńge) baǵyttaý josparlanǵan. Erte qarjylandyrýdyń arqasynda sharýalar qajetti kólemde sapaly tuqymdardy, mıneraldyq tyńaıtqyshtardy, ósimdikterdi qorǵaý quraldaryn, sondaı-aq janar-jaǵarmaı materıaldar men tehnıkany aldyn ala jáne qoljetimdi baǵamen satyp alýǵa múmkindikteri paıda boldy. Eger 2025 jylǵy egis naýqanyna erte qarjylandyrý 2024 jyldyń qarasha aıynyń sońynda bastalǵan bolsa, 2026 jylǵy kóktemgi dala jumystaryna ótinimderdi qabyldaý byltyrǵy qazan aıynda bastaldy. Osynyń nátıjesinde, búgingi kúni shamamen 1 900 sharýa 200 mlrd teńgege qarjylandyryldy, bul jalpy qarjylandyrý kóleminiń 27%-y, — dedi Aıdarbek Saparov.
Sonymen qatar, «Damý» qory arqyly beriletin kepildikter boıynsha nesıe kólemin 300 mlrd teńgege deıin jetkizý josparlandy (2025 jyl — 283 mlrd teńge). Búginde 86 mlrd teńge kólemindegi kredıtterge kepildik berildi. Sondaı-aq otandyq aýyl sharýashylyǵy tehnıkasyn jeńildetilgen lızıngke berý jalǵastyrylyp, onyń kólemi keminde 300 mlrd teńge. (2025 jyl — 246 mlrd teńge)
— Azyq-túlik korporatsııasynyń forvardtyq satyp alý baǵdarlamasy aıasynda 152 sharýadan 34 mlrd teńgege ótinimder kelip tústi, onyń ishinde 40 sharýa 13,8 mlrd teńgege qarjylandyryldy, — dedi mınıstr.
Budan buryn habarlanǵandaı, bıyl jalpy egis alańy shamamen 23,8 mln gektar boldy.