Osy jyly Qazaqstannan et ónimderi qaı elderge shyǵaryldy

ASTANA. KAZINFORM — QR Saýda jáne ıntegratsııa mınıstrligi kórshi elderge jáne Eýropa odaǵyna aýyl sharýashylyǵy ónimderin eksporttaý kólemine qatysty túsinik berdi.

— Qazaqstan bıylǵy birinshi toqsanda eksportqa 10,8 myń tonna qus eti ónimderin 17,9 mln AQSh dollary somasynda Reseı, Qyrǵyzstan, Belarýs, Ózbekstan, Qatar jáne Ázerbaıjanǵa eksporttady. Sondaı-aq, 4,6 myń tonna qoı etin 8,6 mln AQSh dollaryna Ózbekstanǵa, Qatarǵa, BAÁ, Kýveıtke, Saýd Arabııasyna, Iranǵa, Tájikstanǵa, Iordanııaǵa shyǵardy, — delingen mınıstrliktiń Kazinform agenttigine bergen jaýabynda. 

Sonymen qatar, osy jyldyń birinshi toqsanynda Qytaı men Eýropa baǵytynda et jáne ózge de ónimder eksportqa shyǵarylmaǵan.

— Alaıda, Qytaıǵa aýyl sharýashylyǵy ónimderiniń mynadaı túrleri artqanyn nazaryńyzǵa salamyz. Atap aıtqanda, kúnbaǵys maıy 65,4 mln AQSh dollaryna (2,4 ese ósti), zyǵyr tuqymy 39,2 mln AQSh dollaryna (3 ese artty), kúnbaǵys tuqymy 30,3 mln dollarǵa (66,6%-ǵa ósti), arpa dándi jáne burshaq daqyldaryn qaıta óńdeý qaldyqtary 14,1 mln AQSh dollaryna (55,7%-ǵa ósti) jetti. Sondaı-aq, Eýropa odaǵyna bıdaı 53,9 mln AQSh dollaryna (47,7%-ǵa ósti), zyǵyr tuqymy 39,2 mln dollarǵa (2,6 ese artty), raps tuqymy 15,3 mln dollarǵa (7,9 ese artty), keptirilgen kókónis burshaq daqyldary 7,7 mln dollarǵa (20 ese artty) eksporttaldy, — dep naqtylady vedomstvo.

Aıta keteıik, buǵan deıin Aýyl sharýashylyǵy mınıstrligi byltyr Qazaqstan qaı elderge qansha et eksporttaǵanyn málimdegen bolatyn.