Qatar astanasy Dohada stend atýdan Azııa chempıonaty ótip jatyr

ASTANA. KAZINFORM — Atalǵan jarysta Qazaqstan quramasy ázirge bes medal jeńip aldy. Onyń ekeýi — altyn, bireýi — kúmis jáne ekeýi — qola júlde. Bul týraly Ulttyq olımpıada komıteti málim etti.

Áıelder arasynda «skıt» dıstsıplınasy boıynsha Adel Sadaqbaeva altyn medal ıelendi. Osy baǵdarlamada Olga Haılova qola júldege qol jetkizdi.

Komandalyq jarysta Adel Sadaqbaeva, Olga Haılova jáne Ásem Orynbaı birinshi orynǵa kóterilip, altyn medal jeńip aldy.

Erler arasynda «skıt» boıynsha Edýard Eşenko kúmis júldege ıe boldy. Al Qazaqstannyń erler quramasy komandalyq jarysta qola medal enshiledi. El namysyn Ratmır Enıkeev, Edýard Eşenko jáne Ilıa Penkov qorǵady.

Aıta keteıik, Azııa chempıonaty 22 qańtarǵa deıin jalǵasady.

Buǵan deıin Azııa chempıonatynda stend atýdan Qazaqstan jasóspirimder quramasy altyn alǵan bolatyn.