Osy kóktemde Astana men Shymkent áýejaılarynda jóndeý jumystary josparlanǵan

ASTANA. KAZINFORM — «SCAT Airlines» áýe kompanııasy Astana jáne Shymkent áýejaılarynda júrgiziletin jóndeý jumystaryna baılanysty kúndizgi reıster kestesine ýaqytsha ózgerister engiziletinin málimdedi.

Kompanııanyń dereginshe, Astana áýejaıynda jumystar 15 sáýir men 31 mamyr aralyǵynda ótedi. Osy kezeńde kún saıyn saǵat 10:00–den 18:00–ge deıin áýeaılaqtaǵy ushý-qoný jolaǵy ýaqytsha jabylady. Soǵan baılanysty kúndizgi reısterdiń ushý jáne qoný ýaqyty aýysýy múmkin.

Al Shymkent áýejaıynda jóndeý 28-30 sáýir kúnderine josparlanǵan. Bul ýaqytta, ıaǵnı saǵat 12:00–den 18:30–ǵa deıin, reıster qozǵalysyna shekteý qoıylady.

Áýe kompanııasy jolaýshylarǵa reıs mártebesin aldyn ala naqtylap, sapar josparyn ózgeristerdi eskere otyryp qurýǵa keńes beredi.

Budan buryn Shymkent áýejaıynda eski ushý-qoný jolaǵy reısterge kedergi keltirgenin jazǵan bolatynbyz.