Osy demalysta otandyq sportshylar halyqaralyq jarystarda 19 medal jeńip aldy
ASTANA.KAZINFORM - Ótken demalys kúnderi otandyq sportshylar olımpıadalyq sport túrlerinen iri halyqaralyq jarystarda tabysty óner kórsetip, jalpy sany 19 medal ıelendi. Bul týraly Týrızm jáne sport mınıstrligi habarlady.
Álemdik jáne qurlyqtyq dodalarda el namysyn qorǵaǵan birneshe ulttyq qurama joǵary nátıje kórsetip, el sportynyń halyqaralyq arenadaǵy básekege qabilettiligin taǵy bir márte dáleldedi.
Eń tabysty nátıje Qytaıdyń Gýııan qalasynda ótken World Boxing álem kýboginiń ekinshi kezeńinde tirkeldi. Qazaqstan boksshylary qorjynǵa 5 altyn jáne 3 qola medal salyp, jalpy segiz júlde jeńip aldy. Týrnır chempıony atanǵandar: Sanjar Táshkenbaı, Abylaıhan Júsipov, Aıbek Oralbaı, Nazym Qyzaıbaı jáne Vıktorııa Grafeeva.
Indonezııanyń Balı aralynda ótken WKF karateden Azııa chempıonatynda da Qazaqstan quramasy joǵary nátıje kórsetti. Otandastarymyz 2 altyn, 2 kúmis jáne 3 qola medal jeńip alyp, qurlyqtyń úzdik komandalarynyń qatarynan kórindi. Azııa chempıony atanǵandar - Jolaman Bıǵabyl men Oljas Altynbek.
Jeńil atletıkadan Qazaqstan quramasy da el qorjynyna altyn medal saldy.
Qytaıdyń Shaosın qalasynda ótken Azııa estafetalyq chempıonatynda ulttyq qurama aralas quramdaǵy 4×400 metrlik estafetada jeńimpaz atandy. Qurama sapynan Elnor Muhıtdınov, Marııa Shývalova, Andreı Sokolov jáne Adelına Zems júgirdi.
Nıý-Delıde ótken Azııa chempıonatynda otandyq semserlesýshiler tarıhı jetistikke qol jetkizdi. Irına Bakaldına áıelder arasyndaǵy jeke shpaga saıysynda Azııa chempıonatynyń altyn júldesin jeńip alǵan alǵashqy qazaqstandyq sportshy atandy. Al Rýslan Qurbanov erler arasyndaǵy jeke shpaga básekesinde qola medal ıelendi. Nysana kózdeýden de el qorjynyna júlde tústi.
Germanııada ótip jatqan jasóspirimder arasyndaǵy álem chempıonatynda Rınat Kazachenko 50 metr qashyqtyqta úsh qalyptan kishi kalıbrli vıntovkamen atý saıysynda kúmis medal jeńip aldy. Bul - Qazaqstan quramasynyń atalǵan álem birinshiligindegi alǵashqy júldesi.
Ótken demalystaǵy nátıjeler otandyq sportshylardyń joǵary daıyndyq deńgeıin jáne elimizde olımpıadalyq sport túrlerin damytý baǵytyndaǵy júıeli jumystyń jemisti ekenin taǵy bir márte kórsetti.
Qazaqstan ulttyq quramasy bokstan álem kýbogynda kórsetkishin jaqsartqanyn jazǵan edik.
