Osy demalysta kún 32 gradýsqa deıin jylynady

ASTANA. KAZINFORM — Qazgıdromet sınoptıkteri 14-16 qyrkúıek aralyǵyna arnalǵan úsh kúndik aýa raıy boljamyn jarııalady. 

Demalys kúnderi áli de aýqymdy antıtsıklon Qazaqstan aýmaǵynyń kóp bóligin qamtıdy, sol sebepten jaýyn-shashynsyz aýa raıy saqtalady.

Tek eldiń soltústiginde, shyǵysynda jáne ortalyǵynda atmosferalyq fronttardyń áserinen jańbyr jaýady: respýblıkanyń shyǵysynda túngi ýaqytta jaýynnyń sońy qarǵa ulasýy múmkin. 

Respýblıka boıynsha jel kúsheıedi.

Túngi jáne tańerteńgi saǵatta eldiń soltústiginde, soltústik-batysynda jáne shyǵysynda tuman túsedi. 

16 qyrkúıekte topyraq betinde 2 gradýsqa deıin úsik júredi.

Kúndiz aýa temperatýrasy: respýblıkanyń batysynda +20+30°S, soltústik-batysynda +12+25°S, shyǵysynda +5+18°S, ońtústiginde +23+32°S, eldiń soltústiginde jáne ortalyǵynda +15+23°S-tan +10+18°S, ońtústik-shyǵysynda +10+23°S-tan +15+27°S-qa deıin kóteriledi.