Osy demalys kúnderi Astanada qandaı mádenı is-sharalar ótedi
ASTANA. KAZINFORM — Osy senbi-jeksenbide Astana turǵyndary men qonaqtaryna mádenı is-sharanyń san alýan túri usynylady. Olardyń arasynda klassıkalyq balet pen dramalyq qoıylymdardan bastap, ashyq aspan astyndaǵy kontsertter men balalarǵa arnalǵan spektaklderge deıin bar.
Koroldik balet juldyzdarymen «Aqqý kóli» baleti
Demalystaǵy basty mádenı oqıǵalardyń biri — «Astana Opera» sahnasyndaǵy «Aqqý kóli» baleti. 11 jáne 12 qyrkúıekte teatrda Ballet Globe halyqaralyq bı festıvali ótedi.
Kórermender Petr Chaıkovskııdiń mýzykasyna qoıylǵan klassıkalyq baletti «Astana Operanyń» balet trýppasy men sımfonııalyq orkestriniń oryndaýynda tamashalaı alady. Basty partııalardy Kovent-Garden Koroldik baletiniń premerasy Vadım Mýntagırov pen prıma-balerına Fýmı Kaneko oryndaıdy.
Qoıylymda Altynaı Asylmuratovanyń bılep, óner kórsetedi.
«Ertegi túnniń áýeni»
Otbasymen birge mýzykalyq «Ertegi túnniń áýeni» qoıylymyna barýǵa bolady. Onda tanymal álemdik hıtter men klassıkalyq mýzyka oryndalyp, jas kórermenderge birneshe ertegi usynylady.
Qoıylym mýzyka men teatrlyq baıandaýdyń keremet úılesimin kórsetedi. Sol arqyly balalardyń qııalyn damytýǵa, sondaı-aq olardy tanymal áýender men klassıkalyq shyǵarmalarmen tanystyrýǵa baǵyttalǵan.
«Táýeldi»
Áleýmettik drama janryn unatatyn kórermender úshin «Táýeldi» dramaterapııasyna barý durys sheshim bolmaq. Qoıylym lýdomanııa, oıynǵa táýeldilik, nashaqorlyq t. b. táýeldilik túrleriniń zııany men zardabyn kórsetedi.
Keıipkerler bir terapııalyq keńistikte bas qosyp, óz oqıǵalaryn baıandaıdy. Olardyń áńgimeleri arqyly táýeldiliktiń saldary jáne onyń adam ómirine orasan keri áseri ashylady.
«Irına Kaıratovna» qatysatyn OPEN AIR
Zamanaýı qazaqstandyq mýzykany unatatyndar úshin 12 qyrkúıekte open-air formatyndaǵy kontsert ótedi. Basty qatysýshy — «Irına Kaıratovna» toby. Mýzykanttar ózderiniń hıt ánderin jandy bendpen birge oryndaıdy.
Baǵdarlamada CAPTOWN toby, dıdjeıler jáne arnaıy qonaqtar da bar. Uıymdastyrýshylar úlken sahna, jandy dybys jáne ashyq aspan astyndaǵy tolyqqandy mýzykalyq shoý formatyndaǵy keshti ýáde etip otyr.
Úlken dısko-shoý
Keshin mýzykamen ótkizgisi keletinder úshin taǵy bir nusqa — orkestr men hordyń qatysýymen ótetin bı keshi, ıaǵnı dısko-shoý. Bir sahnada 35-ten astam ónerpaz óner kórsetedi.
Baǵdarlamada Black Eyed Peas, Daft Punk, Pharrell Williams, Pitbull, Sia, Britney Spears, Lady Gaga, Adele, Rihanna, Beyoncé, Bruno Mars, Shakira jáne basqa da álemdik oryndaýshylardyń hıtteri oryndalady. Mýzykalyq baǵdarlama Garage jáne Latino baǵyttarynan bastap R’n’B men Lyric-ke deıingi taqyryptyq bloktarǵa bólingen.
«Shámshi»
Jeksenbi kúngi teatr afıshasynda qazaqtyń uly kompozıtory Shámshi Qaldaıaqovqa arnalǵan «Shámshi» spektakli bar.
Qoıylym kompozıtordyń shyǵarmashylyq murasymen ǵana emes, onyń ishki álemimen, tolǵanysymen, bolmysymen de tanystyrady. Oqıǵa Shámshiniń qazaq mýzykalyq mádenıetiniń ajyramas bóligine aınalǵan ánderi arqyly órbıdi.
«Tanakóz»
13 qyrkúıekte ótetin taǵy bir qoıylym — Muhtar Shahanovtyń poemasy negizinde qoıylǵan «Tanakóz». Shyǵarmanyń ózeginde soǵys, qaıǵy-qasiret pen túrli synaqtardan ótken dostyq pen mahabbat taqyryby jatyr.
Eki otbasy men úsh dostyń taǵdyry arqyly urpaqtar sabaqtastyǵy, ákeler rýhyna degen qurmet, anaǵa degen syılastyq jáne shynaıy dostyq kórinisi kórsetiledi. Poema qazaq ádebıetindegi eleýli shyǵarmalardyń biri sanalady.
Buǵan deıin osy aptada otandyq kınoqorjyn tórt birdeı jańa týyndymen tolyqqanyn jazǵanbyz. Olardyń basym bóligi — drama janrynda.
