Osy aptadaǵy kıno jańalyqtary
ASTANA. KAZINFORM — Osy aptada otandyq kınoqorjyn úsh jańa týyndymen tolyqty. Kórermen kópten kútken komedııa men dramany toǵystyrǵan fılmder ekranǵa jol tartty. Sonymen qatar kınoteatr repertýarynda sheteldik horrorlar men shytyrman oqıǵaly dramalar da bar. Balalarǵa arnalǵan qyzyqty sıýjette qurylǵan mýltfılmder de az emes.
Kazinform tilshisiniń sholýynda osy aptadaǵy eń basty kınopremeralardy usynamyz.
Kollaj: Kazinform / Kinopoisk.ru
1+3
Janry: komedııa
Uzaqtyǵy: 93 mınýt
El: Qazaqstan, 2026
Rejısser: Darhan Sárkenov
Omar - óte baı, bedeldi, dáýletti bıznesmen. Biraq ol ómirden baz keshken adam, óıtkeni múgedekter arbasyna tańylǵan. Taǵdyryna moıynsunǵysy kelmeıdi, biraq amaly joq. Oǵan úmit syılaıtyn bir ǵana jan bar, mahabbaty! Omar súıgenin kórý úshin Tashkentke barady. Osy sapary onyń ómirin túbegeıli ózgertedi. Ol Baqtııar, Sydyq, Jomart esimdi jigittermen kezdeısoq tanysady. Bul tanystyqtyń sońy ár keıipkerdiń ómirine ózgeris alyp keledi.
Muǵalim
Janry: komedııa, drama
Uzaqtyǵy: 95 mınýt
El: Qazaqstan, 2026
Rejısser: Aıana Nýrdınova
Balqash qalasynda mýzyka pániniń muǵalimi Jandos turady. Ol úlken qalaǵa kóshýdi armandaıdy. Ony oqýshylary jaqsy kóredi, al mektep basshylyǵy qosymsha tabys tabý úshin isteıtin jumysyna kóz juma qaraıdy. Kóp uzamaı Jandosqa úlken qalaǵa ketýge múmkindik týady. Endi ol úshin ne mańyzdy ekenin tańdaýy kerek.
Qyzyl Raýshan
Janry: drama, ekshn
Uzaqtyǵy: 85 mınýt
El: Qazaqstan, 2026
Rejısser: Qýat Ibragımov
Táýelsizdiktiń alǵashqy jyldary. Eki kórshiles aýyl turǵyndarynyń arasynda qaqtyǵys órshıdi. Áskerden oralǵan Bákir súıiktisi Raýshanmen qaıta qaýyshyp, qalaǵa oqýǵa ketip, jańa ómir bastaýdy armandaıdy. Alaıda aǵasy Shákirdiń jospary basqa edi. Bákir endi mahabbaty, armany men aǵasynyń kegi arasynan tańdaý jasaýǵa májbúr bolady.
Marına Vladı
Janry: drama, melodrama, tarıh
Uzaqtyǵy: 100 mınýt
El: Frantsııa-Vengrııa-KSRO, 2017
Oleg Boretskııdiń kınoklýby. Frantsýz aktrısasy Marına Vladı jaıly tarıhı fılm. Ol Roberto Rossellını, Jan-Per Melvıl, Jıýl Dassen jáne Marko Ferrerı syndy tanymal rejısserlerdiń fılmderinde oınaǵan. Aktrısanyń ekrandaǵy tartymdylyǵy tek sulýlyǵymen emes, názik bolmysymen jáne dramalyq obrazdardy sheber somdaýymen erekshelendi. Marına Vladı keıpiker taǵdyryn ekranda áserli jetkizip, kórermenge umytylmas obrazdar qaldyrdy.
Meniń ıtim – Gohan, (Moı pes Gohan)
Janry: drama
Uzaqtyǵy: 141 mınýt
El: Taıland, 2026
Rejısser: Chaıanop Býnprakob, Atta Hemvadı, Nattavýt Pýnpırııa
Gohan esimdi aq ıt on jyl ishinde úsh túrli adamnyń úıinde ómir súredi. Alǵashqy ıesi — zeınetke shyqqan japon ınjeneri. Keıin ony qujaty joq bırmalyq úı qyzmetshisi asyraıdy. Odan soń Gohan jas taılyq ǵashyqtardyń úıine keledi. It olardyń ómirindegi mańyzdy sátterdiń kýási bolyp, árqaısysynyń taǵdyryna ózinshe áser etedi.
Sıqyrly qaýyrsyn, (Volshebnoe pero)
Janry: shytyrman oqıǵa, mýltfılm, fentezı
Uzaqtyǵy: 87 mınýt
El: Frantsııa, Belgııa, 2026
Rejısser: Fılıpp Rısh
Jas qııalshyl Provıdenstiń qolyna sıqyrly qaýyrsyn túsedi. Ol qaýyrsynmen jazylǵan kez kelgen tilek oryndalady. Qyz eń aldymen teńiz shoshqasy Pýfıkke til bitiredi. Alaıda Pýfık kóńili tolmaı júretin, bárinen qorqatyn bolyp shyǵady. Ekeýin jer sharyn aralaıtyn tańǵajaıyp ári qaýipti saıahat kútedi. Jolda olar jańa dostar tabady. Biraq basty mindetteri — álemdi aılaker sıqyrshydan qutqarý.
Kúlmes hanshaıym, (Tsarevna Nesmeıana)
Janry: shytyrman oqıǵa, otbasylyq, fentezı
Uzaqtyǵy: 96 mınýt
El: Reseı, 2026
Rejısser: Vasılıı Rovenskıı
Pragmatık Erema qaryndasymen birge kezdeısoq ertegidegi Trıdevıatoe patshalyǵyna tap bolady. Endi ol talaı synaqtan ótip, Kúlmes hanshaıymdy Sý patshasynan qutqarýy kerek. Osy sapar barysynda Erema alǵash ret óz júregine úńilip, ózin tanýǵa múmkindik alady.
Arahnıd
Janry: ýjas, trıller
Uzaqtyǵy: 86 mınýt
El: AQSh, 2026
Rejısser: Anhel Gomes Ernandes
Turǵyn úı kesheniniń turǵyndary ýly órmekshilerdiń shabýylyna tap bolady. Bul — kórermenniń jasyryn qorqynyshtaryn oıatatyn úreıli fılm.
Birlesken avtorlar, (Soavtory)
Janry: komedııa, drama
Uzaqtyǵy: 86 mınýt
El: Reseı, 2026
Rejısser: Fılıpp Lars
Jazýshy taǵy bir sátsiz keshti bastan ótkeredi. Ol basty ádebı syılyqty taǵy da ala almaı qalady. Al marapattaý rásiminen keıin onyń ámııanyn urlap ketedi. Keıin qalta urysy jábirlenýshisiniń kim ekenin bilip, onyń kitabyn oqıdy da, jazýshydan shákirt bolýǵa ótinedi. Ekeýi de sátsiz ótken sol keshtiń ómirlerin túbegeıli ózgertetinin bilmeıdi.
Ymyrt. Saga. Jańa aı, (Sýmerkı. Saga. Novolýnıe)
Janry: shtyrman oqıǵa, drama, melodrama, fentezı
Uzaqtyǵy: 130 mınýt
El: AQSh, 2026
Rejısser: Krıs Vaıts
Vampır Edvardqa ǵashyq bolǵan Bella Svon eń aýyr synaqqa tap bolady. Edvard ony vampır klandarynyń qaqtyǵysynan qorǵaý úshin ketip qalady. Bella onyń joǵalýyn aýyr qabyldap, dosy Djeıkob Blekke jaqyndaı túsedi. Alaıda Djeıkobtyń da qaýipti qupııasy bar. Ol vampırlerden de qatal ári qaýipti tylsym kúsh ıeleriniń qatarynan. Kópshiliktiń súıikti mahabbat hıkaıasy qaıtadan úlken ekranǵa shyǵady.
Verıtıdiń qupııa kúndeligi, (Taınyı dnevnık Verıtı)
Janry: detektıv, drama, qylmys, melodrama, trıller
Uzaqtyǵy: 114 mınýt
El: AQSh, 2026
Rejısser: Maıkl Shoýolter
Jumys izdep júrgen jazýshy Loýen Eshlıge tanymal jazýshy Verıtı Kroýfordtyń aıaqtalmaǵan romandaryn jalǵastyrý usynylady. Verıtı jumbaq oqıǵadan keıin shyǵarmalaryn aıaqtaı almaı qalǵan. Loýen onyń jeke jazbalaryn taýyp alǵan soń, otbasylyq qupııalarǵa tap bolady. Endi ol shyndyq pen oıdan shyǵarylǵan dúnıeniń arajigin ajyratýǵa tyrysady. Osy kezde Loýen men Verıtıdiń kúıeýi Djeremı arasyndaǵy qarym-qatynas ta ózgere bastaıdy.
Ótken aptadaǵy kınopremeralar tizimin osy jerden kóre alasyzdar.
