Osy aptada qaı óńirlerde jylytý maýsymy bastalady
ASTANA. KAZINFORM – Qazaqstannyń bes óńirinde jylytý maýsymy bastaldy. Aýa raıyna baılanysty osy aptanyń sońyna deıin taǵy bes óńirde jylý berile bastaıdy. Bul týraly Energetıka vıtse-mınıstri Qaıyrhan Tutqyshbaev Úkimet otyrysynda aıtty.
Qazirgi ýaqytta jylytý maýsymy Pavlodar, Aqmola, Qostanaı, Soltústik Qazaqstan oblystarynda jáne Shyǵys Qazaqstan oblysynyń Rıdder qalasynda bastalǵan.
Aýa raıy kórsetkishterine qaraı, osy aptanyń sońyna deıin Astana qalasynda, sondaı-aq Qaraǵandy, Aqtóbe, Atyraý jáne Abaı oblystarynda jylytý maýsymyn bastaý josparlanyp otyr.
– Jalpy, jylý berý maýsymyna daıyndyq jumystary bekitilgen kestege sáıkes júrgizilip jatyr. Energııa kózderinde qajetti otyn qory jınaqtalyp, tıisti jabdyqtar daıyndalǵan. 17 myń shaqyrym elektr berý jelisindegi jóndeý jumystary tolyq kólemde oryndaldy. Tórt qosalqy stantsııadaǵy jumystar aıaqtalý satysynda. Jylý jelileriniń jalpy daıyndyǵy josparlanǵan 377 shaqyrymnyń 374 shaqyrymyna nemese 99% jetti, – dedi vıtse-mınıstr.
Onyń aıtýynsha, jylý maýsymyna daıyndyq deńgeıi boıynsha birqatar óńir Energetıka mınıstrliginiń erekshe baqylaýynda.
– Ótken aptada Petropavl qalasynda úsh jylý magıstralin rekonstrýktsııalaý jumystary tolyq aıaqtaldy. Stepnogorsk qalasynda áleýmettik nysandarǵa jylý berý 25 qyrkúıekte bastaldy. Jylý magıstralin rekonstrýktsııalaý aıaqtaldy. Qazir jelilerdi tazalaý jáne qysymmen synaý jumystary júrgizilip jatyr. Іshki taratý jelilerindegi jumystar da aıaqtalyp, tutynýshylardy qosý bastaldy, – dedi Qaıyrhan Tutqyshbaev.
Semeı qalasynda úsh ýchaskedegi jumystardyń oryndalý deńgeıi esepti aptada 12 paıyzǵa ósti. Osylaısha, jospardyń jalpy oryndalýy 82 paıyzdy qurady. Sorǵy jabdyǵy 27 qyrkúıekte jetkizilip, qazir ony montajdaý jumystary júrgizilip jatyr.
– «Parýs» jáne «Vırb» sorǵy stantsııalaryndaǵy jumystardy aldaǵy aptada aıaqtaý josparlanǵan. Al 340-shy kvartaldaǵy sorǵy stantsııasynda jabdyqty montajdap, nysandy tolyq iske qosýǵa shamamen eki apta qajet. Jumystardy 15 qazanǵa deıin aıaqtaý kózdelip otyr. Osyǵan baılanysty Abaı oblysynyń ákimdigine jóndeý jumystaryn barynsha qysqa merzimde aıaqtaý tapsyryldy, – dedi Qaıyrhan Tutqyshbaev.
Ótken aptada Energetıka mınıstri Erlan Aqkenjenov óńirlerdiń daıyndyǵy men jańǵyrtý jumystary týraly baıandaǵan edi.
