Osy aptada halyqty aýyzsýmen qamtamasyz etý jumystaryn keshiktirgen basshylar jaýapqa tartylady
ASTANA. KAZINFORM — Ónerkásip jáne qurylys mınıstrligi Qurylys jáne turǵyn úı-kommýnaldyq sharýashylyq isteri komıtetiniń tóraǵasy Baqytjan Júnisbekov halyqtyń aýyzsýmen qamtamasyz etý jumystaryn keshiktirgen óńirlerdiń máselesi qaralatynyn aıtty.
— Osy aptada aýyz sýmen qamtamasyz etý jónindegi keńes bolady. Aptanyń sońyna deıin osynyń aldynda ataǵan Abaı oblysy sııaqty sýmen qamtamasyz etý jónindegi nysanaly ındıkatorlarǵa qol jetkizbeý qaýpi bar óńirlerdiń jaýapty basshylary tártiptik jaýapkershilikke tartylady, — dedi ol ortalyq kommýnıkatsııalar qyzmetinde ótken baspasóz máslıhatynda.
Al Qurylys jáne turǵyn úı-kommýnaldyq sharýashylyq isteri komıteti tóraǵasynyń orynbasary Nursultan Keremqulov buǵan deıin halyqty aýyzsýmen qamtamasyz etý jumysyn jospardan keshiktirgeni úshin óziniń da jazaǵa tartylǵanyn eske saldy.
— Shilde aıynda Memleket basshysynyń Kókshetaý sý tazartý qurylysyn qaıta jańartý jónindegi tapsyrmasyn ýaqtyly oryndamaǵany úshin menimen birge Aqmola oblysy ákiminiń birinshi orynbasary Erdos Ramazanov tártiptik jaýapkershilikke tartylǵan, — dedi komıtet basshysynyń orynbasary.
Buǵan deıin elimizde aýyzsýdy esepteýdiń jańa ádistemesi bekitilgenin jazǵan edik.