Osy aptada el kınoteatrlarynan qandaı týyndylardy kórýge bolady
ASTANA. KAZINFORM — Otandyq kınoteatrlardyń ekranyna birneshe jańa týyndy shyqty. Olardyń qatarynda «90+1», «Gáp», «Kúrt burylys» syndy fılmder bar.«90+1»
Bıyl fýtbol taqyrybyna arnalǵan alǵashqy kınotýyndy. Fılm jas fýtbolshynyń armanyna jetý jolyndaǵy kúresin baıandaıdy. Kınokartınanyń rejısseri — «Bıznes po-kazahskı», «Ákim» sekildi jobalarmen tanylǵan Tımýr Dýlatov. Basty rólderdi Qýanysh Kerimqulov, Almat Saqatov jáne tanymal bloger Artýr Asqaruly somdaıdy. Fılm Mádenıet jáne aqparat mınıstrligi, Ulttyq kıno ortalyǵynyń qoldaýymen túsirilgen.
Fılm sıýjetine kelsek, basty keıipkerdiń ata-anasy jol apatyna ushyrap, oǵan otbasynyń tiregi ári súıenishi bolýǵa týra keledi. Fýtbol dese, janyn beretin jigittiń bala kúngi armanynan qol úzgisi joq. Týyndy shytyrmanǵa toly hıkaıaǵa negizdelgen.
«Gáp»
Bir-birimen otbasylyq aralasatyn dostar arasyndaǵy kóńildi fılm. 5 otbasy aı saıyn, árkim óz kezegimen GÁP ótkizip, qara kassa oınaýdy úrdiske aınaldyrǵan. Bir-birinen asyp túsý úshin olardyń bireýi GÁP oıynyn Kambodjada ótkizedi. Ózge memlekette dostar shytyrman oqıǵaǵa tap bolady.
«Qyzyl dambal»
Bul — Ámir Qaraqulov túsirgen tragıkomedııa. Fılm oqıǵasy otbasynda zorlyq-zombylyq kórgen birneshe áıeldiń «bandaǵa» birigip, ózderine zorlyq-zombylyq kórsetkenderdi ustap, jazalaǵany týraly baıandaıdy. Top belgisi — qyzyl dambal.
«Djýn men Djon»
«Leon», «Besinshi element» syndy tanymal fılmderdiń rejısseri Lıýk Besson túsirgen romantıkalyq boevık. Keńse qyzmetkeri Djon jandúnıesi qupııaǵa toly Djýmen kezdesedi. Ol keńse qyzmetkeriniń qalypty ómiriniń astan-kesteńin shyǵarady. Olar qaýipti ári eliktirer árekette birge attanady.
«Aıdahardy qalaı qaıta tárbıeleý kerek»
Búkil otbasyna arnalǵan anımatsııalyq oqıǵa. Kishkentaı aıdahar men teńiz jylqysy álemniń taǵdyryn ózgerte alatyn sıqyrly artefaktilerdi izdeıdi. Biraq moraldyq tańdaýǵa tap bolǵan kishkentaı aıdahar jaqsylyqty nemese jamandyqty qabyldaıtynyn sheshýi kerek.
«Jan kollektsıoneri»
Qytaı trıller-detektıvi. Elıtalyq áıelder mektebinde oqýshylar joǵalyp ketip, olardyń biri kóp uzamaı óli kúıinde tabylady. Tergeý kúdiktiniń birneshe adam bolýy jáne olardyń árqaısysynyń óz dáleliniń bolýy saldarynan qıyndaı túsedi.
«Ósh shalý-2»
Basty rólde Ben Afflek oınaǵan 2016 jylǵy fılmniń jalǵasy. Krıstıan Výlf — aýtızm spektri buzylǵan daryndy matematık. Ol jaýdyń búkil armııasyn jalǵyz ózi jeńýge qaýqarly. Jańa fılmde ol aǵasymen birigip, adam saýdasymen aınalysatyn kartelmen kúresedi, habar-osharsyz ketkenderdi izdeıdi.
«Kúrt burylys»
Ben Foster («ıÝmaǵa baǵyt alǵan poıyz», «Kez kelgen jaǵdaıda») men Kobı Smýlders («Kek alýshylar: Fınal», «Tynysh aılaq») bas rólderdi somdaǵan psıhologııalyq trıller. Djosh otbasymen birge qaýipti burylystyń janynda ornalasqan jańa úıge kóshedi. Birneshe jol apatyna kýá bolǵan ol ózgelerdi qutqarý múmkindigin izdeı bastaıdy. Múmkin ol syrttaı solaı bolyp kóringenin qalaı ma? Rassel Vangerskıı shyǵarmasy negizinde túsirilgen fılm qazirdiń ózinde synshylardyń joǵary baǵasyna ıe boldy: Rotten Tomatoes-tegi reıtıngi 94 paıyz.