Osy aptada Aqtóbede egin orý naýqany aıaqtalady

AQTÓBE. KAZINFORM – Búginde 450 myń tonna astyq bastyryldy. Bıyl gektarynan 11 tsentner ónim jınalyp jatyr. 

Aqtóbe oblysynyń sharýalary men dıqandary bıyl 755 myń gektar jerdi ıgerip, dándi jáne maıly daqyl ekti. Búginde dándi daqyldyń 99%-y jınaldy. Dıqandar 450 myń tonna ónim alǵan.

Osy aptada jumys tolyq aıaqtalady. Al maıly daqyldardy jınaý jumysy endi bastaldy. Ázirge tek 20 myń gektardan astam alqapta orý jumysy júrgizildi. Munda ár gektarynan orta eseppen 9,8 tsentner ónim jınalyp jatyr. 

– Bıyl oblysta dándi daqyldardyń alqaby 426,4 myń, maıly daqyldarda 60,3 myń, kartop jáne kókónis, baqsha daqyldary 6,1 myń ga boldy. Sonymen birge mal azyǵy bar. Egin jınaý jumystaryn júrgizýge qajetti tehnıka jetkilikti jáne dızel otyny tolyq bólindi. Astyq saqtaý oryndarynyń jalpy syıymdylyǵy – 685,1 myń tonna. Qazirgi ýaqytta elevatorlarda 136 myń tonna astyq saqtalǵan. Bul júktemeniń 34%-y ǵana. Sondaı-aq bıyl ǵana 120,5 myń tonna astyq qabyldandy. Barlyq astyq qabyldaý kásiporynynda gaz jáne dızel otynyn paıdalanatyn astyq keptirgish mashınalary jumys istep tur, - dedi Aqtóbe oblystyq aýyl sharýashylyǵy basqarmasy bóliminiń basshysy Nurbek Raıymbaev. 

Onyń aıtýynsha, aýa raıy qolaıly bolyp, bıyl astyq artyq shyǵynsyz jınaldy. 

Aıta keteıik, shildede Aqtóbede astyq saqtaıtyn qoımalardyń ázirligi tekserildi.