Osh jáne Jalalabad qalalarynda kópqabatty tórt turǵyn úı paıdalanýǵa beriledi
BІShKEK-OSh. 18 sáýir. QazAqparat /Arnur Rahymbekov/ - Aldaǵy mamyr aıynda qyrǵyzdyń Osh jáne Jalalabad qalalarynda byltyrǵy maýsym aıyndaǵy oqıǵalar kezinde zardap shekken otbasylarǵa arnalǵan kópqabatty tórt turǵyn úıdiń qurylysy aıaqtalýy tıis.
Osh jáne Jalalabad qalalaryn qalpyna keltirý jáne damytý jónindegi memlekettik dırektsııanyń bas dırektory Jartoro Satybaldıev merdiger uıymdardyń aldyna osyndaı mindet qoıdy. Atalǵan qalalarda kópqabatty úıler turǵyzyp jatqan merdiger uıymdardyń basshylarymen bolǵan kezekti kezdesýde J.Satybaldıev qurylys jumystarynyń qarqynyn jedeldetýdi talap etti.
«Mamyr aıynda biz kópqabatty tórt turǵyn úıdiń, atap aıtqanda 24 páterli bes qabatty bir úıdiń, 64 páterli tórtqabatty bir úıdiń jáne 60 páterli bes qabatty eki úıdiń qurylysyn tolyq aıaqtaýymyz kerek», dedi ol.
Qazirgi tańda memlekettik dırektsııa 25 kópqabatty turǵyn úıdiń, 2 orta mekteptiń, Osh qalasyndaǵy Іshki ister basqarmasynyń Jol qozǵalysynyń qaýipsizdigin qamtamasyz etý bólimi men tirkeý-emtıhan qabyldaý bóliminiń ákimshilik ǵımaratynyń qurylystaryn júrgizýde, Osh qalasynda jáne Jalalabad oblysynyń Bazar-Qorǵan aýylynda eki tas joldy jóndeý jumystaryn qadaǵalaýda, sondaı-aq birqatar áleýmettik-mádenı nysandardy kúrdeli jóndeý jumystarynan ótkizýde.
