Osh qalasynda Qazaqstannyń Bas konsýldyǵy resmı túrde ashyldy
ASTANA. KAZINFORM – QR Prezıdenti Qasym-Jomart Toqaevtyń Qyrǵyz Respýblıkasyna resmı sapary qarsańynda Osh qalasynda Qazaqstan Bas konsýldyǵynyń ashylý rásimi ótti, dep habarlaıdy QR Syrtqy ister mınıstrliginiń baspasóz qyzmeti.
Іs-sharaǵa Qazaqstan Syrtqy ister mınıstriniń orynbasary Ermuhambet Qonyspaev, Qyrǵyzstan Syrtqy ister mınıstriniń birinshi orynbasary Aseın Isaev, Qyrǵyzstan Prezıdentiniń Osh oblysyndaǵy Ókiletti ókili Elchıbek Djantaev, Osh qalasynyń meri Jenıshbek Toktorbaev, sondaı-aq qyrǵyz qoǵamynyń jáne isker toptarynyń ókilderi qatysty.
Іs-sharaǵa qatysýshylarǵa arnaǵan sózinde E.Qonyspaev atalǵan óńirde QR Bas konsýldyǵynyń ashylýy eki el arasyndaǵy tatý kórshilik pen baýyrlastyq qatynastardyń berik ári myzǵymas sıpatyn aıqyndaıtyn erekshe mańyzdy oqıǵa ekenin atap ótti.
«Qazaqstan men Qyrǵyzstan – kórshiler ǵana emes, ortaq qundylyqtar men Ortalyq Azııadaǵy beıbitshilik, turaqtylyq pen órkendeýge umtylys biriktirgen eń jaqyn seriktester jáne odaqtastar. Búginde qazaq-qyrǵyz yntymaqtastyǵy jan-jaqty ózara is-qımyldyń joǵary qarqynymen sıpattalady. Memleket basshylarymyzdyń saıası erik-jigeriniń jáne joǵary ári bıik deńgeıdegi turaqty baılanystardyń arqasynda eki el arasynda memleketaralyq ózara is-qımyldyń úlgili modeli qalyptasty», – dedi mınıstrdiń orynbasary.
Osyǵan oraı E.Qonyspaev Osh qalasynda QR Bas konsýldyǵynyń ashylýy elder men halyqtar arasyndaǵy baýyrlastyq qatynastardy odan ári nyǵaıtýǵa tyń serpin beretin taǵy bir mańyzdy qadam bolatynyna senim bildirdi.
Óz kezeginde A.Isaev Qazaqstannyń Osh qalasynda Bas konsýldyǵynyń ashylýy – eki baýyrlas el arasyndaǵy odaqtastyq qatynastardyń tereńdeı túskenin kórsetetin mańyzdy dálel ekenin jáne bul qadam ekijaqty jan-jaqty yntymaqtastyqty odan ári nyǵaıtyp, keńeıtýge jańa serpin beretinin atap ótti.
Osh qalasynyń meri J.Toktorbaev óz sózinde uly qazaq aqyny ári oıshyly Abaı Qunanbaıulynyń 180 jyldyq mereıtoıyna oraı qaladaǵy kóshelerdiń birine onyń esimi beriletinin jetkizdi.
Qazaqstan Bas konsýldyǵynyń konsýldyq okrýgine Osh, Jalal-Abad jáne Batken oblystary kiredi. Atalǵan óńirlerde shamamen 3 myńǵa jýyq Qazaqstan azamaty turady.
500 myńǵa jýyq halqy bar Osh qalasy – Qyrǵyzstannyń ońtústik óńirinde ákimshilik, ekonomıkalyq jáne mádenı ortalyq retinde mańyzdy ról atqaratyn eldiń ekinshi iri qalasy.
Osyǵan deıin 22 tamyz kúni Memleket basshysy Qasym-Jomart Toqaev Prezıdent Sadyr Japarovtyń shaqyrýymen Qyrǵyz Respýblıkasyna resmı saparmen baratyny týraly jazdyq.