Osh bıligi lańkestik týraly aldyn ala saqtandyrǵandarǵa aqsha tóleýge ýáde etti
ASTANA. 15 jeltoqsan. QazAqparat - Osh meri (Qyrǵyzstannyń Osh oblysynyń ákimshilik ortalyǵy) jáne jergilikti mılıtsııa lańkestiktiń aldyn alý, sondaı-aq qarý jasyrylǵan qupııa oryndar týraly habar bergen adamdarǵa «syıaqy» tóleýdi uıǵardy.
Bul týraly "Interfaks" habarlaıdy.
«Syıaqy» kólemi ázirge belgisiz. Oshta qazir birneshe avtomat, qoparǵyshtar men kóp kólemde oq-dári saqtalǵan qupııa oryn tabyldy. Taıaýda osy jaǵdaıdan keıin, «Mır» telekompanııasy habarlaǵandaı, qala meri Melıs Myrzahmetov keıbir bandalar Qyrǵyzstannyń ońtústiginde lańkestik uıymdastyryp, ultaralyq qaqtyǵystarǵa arandatyp jatqanyn málimdedi.
