Osal sanattaǵy oqýshylardyń mektepke daıyndyǵyna 25,3 mlrd teńge jumsaldy

ASTANA. KAZINFORM — Jańa oqý jylynyń qarsańynda áleýmettik osal sanattaǵy oqýshylardyń barlyǵy «Jalpyǵa birdeı bilim berý qory» aıasynda tolyq qamtyldy, dep habarlaıdy Oqý-aǵartý mınıstrliginiń baspasóz qyzmeti.

Jergilikti atqarýshy organdardyń derekterine sáıkes ata-analardyń jáne zańdy ókilderdiń esepshottaryna mektep formasyn, aıaq kıim men oqý-quraldaryn satyp alýǵa 25,3 mlrd teńge aýdaryldy.

500 myńnan astam balaǵa qoldaý kórsetildi. Onyń ishinde — jetim balalar men ata-anasynyń qamqorlyǵynsyz qalǵandar, az qamtylǵan otbasylardyń balalary, ataýly áleýmettik kómek alýshylar, sondaı-aq ómirlik qıyn jaǵdaıǵa tap bolǵan balalar bar.

— Jalpyǵa birdeı bilim berý qory jyl saıyn balalardyń jańa oqý jylyna daıyndalýyna kómektesedi. Bul ata-analarǵa balalaryn mektepke daıyndaýǵa múmkindik beredi jáne árbir oqýshy úshin teń múmkindikter jasaıdy. Aıta ketý kerek, atalǵan qor — memleket tarapynan kórsetiletin qoldaýdyń negizgi tetikteriniń biri, — dep atap ótti QR Oqý-aǵartý mınıstrligi Balalardyń quqyqtaryn qorǵaý komıtetiniń tóraıymy Nasymjan Ospanova.

Bıylǵy jyly bir balaǵa beriletin eń tómengi tólem mólsheri 46 228 teńgeni quraıdy. Sonymen qatar, máslıhattardyń sheshimimen keıbir óńirlerde joǵaryraq kórsetkishter belgilengen: Almaty qalasynda — 55 000 teńge, Jambyl oblysynda — 53 117 teńge, Pavlodar oblysynda — 53 663 teńge.

Aıta keterligi, 2023 jyldan beri materıaldyq kómektiń kólemi bir balaǵa 17 myńnan 46 myń teńgege deıin 2,5 esege artty.

Osydan buryn Semeıde 5000-ǵa jýyq oqýshy alǵash ret mektep tabaldyryǵyn attaıtynyn habarlaǵan edik.