Osakarov kentinde 25 myń tonna astyqqa arnalǵan zamanaýı elevator salyndy
OSAKAROV. QazAqparat – Osakarov kentinde 25 myń tonna astyqqa arnalǵan zamanaýı elevator salyndy. Astyq qabyldaý kásiporny Osakarov jáne Nura aýdandaryna, sondaı-aq Aqmola oblysynyń Arshaly aýdanyna baǵdarlanatyn bolady, dep habarlaıdy QazAqparat tilshisi.
Osakarov aýdany boıynsha jumys sapary barysynda Qaraǵandy oblysynyń ákimi Jeńis Qasymbekke jobanyń josparlary men iske asyrylýy týraly «Sarybel NAN» dırektory Vıtalıı Prokop aıtyp berdi.
«Elevator jobasy 6 jyl buryn oılastyrylǵan bolatyn. Naryqty uzaq zerttedik. Sońǵy eki jylda ol túbegeıli ózgerdi. Astyq treıderleri baǵany kóteredi. Elevatordyń ashylýy Nura jáne Osakarov aýdandary arasyndaǵy logıstıkaǵa 200 mln teńge únemdeýge múmkindik beredi. Táýligine 2 myń tonna júk tıeı alamyz. Saqtaý, keptirý, qabyldaý, jóneltý qarastyrylǵan. Syımdylyǵy bir ýaqytta 50 vagon bolatyn temirjol tuıyǵy salyndy. Tıeýdiń negizgi baǵyttary – Qazaqstannyń ońtústigi jáne jaqyn shetel», – dedi Vıtalıı Prokop.
Osy kúzde elevator astyq qabyldaýdy bastaıdy. Ony tolyǵymen 2022 jyldyń maýsym aıynda iske qosý josparlanyp otyr.
Jeńis Qasymbek sondaı-aq jergilikti sharýa qojalyqtarynyń egin jınaý naýqanynyń barysymen tanysty.
Osakarov aýdanynyń ákimi Núrken Kóbjanovtyń aıtýynsha, astyq jınaý jumystary merziminde júrgizilýde. Sapa men ónimdilik kórsetkishteri jaqsy. Jumystardy 25 qyrkúıekke deıin aıaqtaý josparlanýda.
Aýdanda bıdaı, arpa, suly, jasymyq, kartop jáne maıly daqyldar ósiriledi.
Dándi daqyldar 75,0% (281,1 myń gektar), kartop 21,5% (85 gektar), kókónis 71,9% (23 gektar) jınaldy.
Barlyq sharýa qojalyqtar bıdaı jáne kartop ónimderimen oblystyq turaqtandyrý qoryn qalyptastyrýǵa qatysady.
Osakarovkada sonymen qatar oblys ákimi kúrdeli jóndeýden ótken «Jastar» balalar-jasóspirimder ortalyǵynda boldy. Ashylǵan sátten bastap ǵımarat eshqashan kúrdeli jóndeýden ótpegen. Ótken jyly «Aýyl – El besigi» baǵdarlamasy boıynsha ortalyq qalpyna keltirildi.
Aýdannyń jas turǵyndary munda grafıka, dızaın, 3D-modeldeý jáne robototehnıkany meńgeredi, sondaı-aq jeti baǵyt boıynsha qosymsha bilim alady.
Osakarovkada «Nurly jol» memlekettik baǵdarlamasy boıynsha 2 qabatty alty úı salynýda. 108 otbasy baspanaly bolady. Oblys ákimi qurylys qarqynyn báseńdetpeýdi jáne turǵyn úıdi merziminde qoldanysqa berýdi tapsyrdy.
Jumys sapary barysynda óńir basshysy uzyndyǵy 81 shaqyrym oblystyq mańyzy bar Osakarovka – Molodejnyı jáne Osakarovka – Nura (83 km) joldarynyń jóndeý jumystarynyń barysymen tanysty. Osakarovka – Molodejnyı avtojolynyń jaǵdaıy kóp jyldar boıy nashar boldy. Jóndeý jumystary birneshe jyl júrgizilip keledi. Osakarovka – Molodejnyı jolynyń kezekti 37 shaqyrymy bıyl aıaqtalady.
