Osakarov aýdanynyń Molodejnyı kentin damytýǵa 1,3 mlrd teńge jumsalady

QARAǴANDY. QazAqparat – Qaraǵandy oblysy Osakarov aýdanynyń Molodejnyı kentine bıyl 1,3 mıllıard teńge jumsalmaq. Qarajat «Aýyl - El besigi» baǵdarlamasy boıynsha bólindi. Qaraǵandy oblysynyń ákimi Jeńis Qasymbekke aýdanǵa jumys sapary barysynda bıýdjet qarajatynyń naqty qaıda jumsalatyny týraly aıtyldy, dep habarlaıdy QazAqparat tlshisi.

Jergilikti bıliktiń aıtýynsha, alty joba júzege asyrylyp, 70-ke jýyq jumys orny ashylady. Mádenıet úıi, eki mektep pen sport kesheni kúrdeli jóndeýden ótedi, sondaı-aq Molodejnyı men Aqbulaq aýyldarynyń eki joly jóndeledi.

«Ótken jyly biz aýdan ortalyǵy men jaqyn mańdaǵy aýyldarǵa nazar aýdardyq. «Jumyspen qamtýdyń jol kartasy« baǵdarlamasy boıynsha Osakarovkadaǵy 54 kóshe jóndeldi, ortalyqtandyrylǵan jylýǵa qosymsha bilim berý ortalyǵy qosyldy, Ýyzbaı aýylynyń sý qubyry jelileri salyndy, aýyldarǵa kireberis joldar jóndeldi, Molodejnyı kentindegi №7 qazandyqqa jáne jylý jelilerine aǵymdaǵy jóndeý júrgizildi, sondaı-aq ortalyqtandyrylǵan jylýǵa turǵyn úıler, mádenı-saýyq ortalyǵy men «Aıgólek« balabaqshasy qosyldy. Bıyl aýyl jastaryna basa nazar aýdarylatyn bolady», - dedi Jeńis Qasymbek.

Oblys basshysy turǵyn úı máselesin de qozǵady. «Nurly jer» baǵdarlamasy aıasynda halyqtyń áleýmettik osal toptary úshin 60 páterli jalǵa beriletin úı salynatyn qurylys alańyn aralap kórdi.

Jalpy Osakarov aýdany bıyl áleýmettik turǵyn úı kezeginde turǵan 120 otbasyn páterlermen qamtamasyz etýdi josparlap otyr.

Oń ózgeristerge qaramastan, jastar salasynda problemalyq máseleler de bar. Mysaly, Jeńis Qasymbek jergilikti aýrýhanaǵa barǵan kezinde oǵan medıtsınalyq mekemege jóndeý qajet ekeni týraly aıtyldy. Oblys basshysy JSQ ázirleýdi tapsyrdy, sodan keıin qarjylandyrý máselesi sheshiletin bolady.

Jeńis Qasymbek sondaı-aq Pavlodar, Qaraǵandy, Aqmola oblystarynyń jáne Nur-Sultan qalasynyń tutynýshylaryna sý beretin Qanysh Sátpaev atyndaǵy kanaldyń №19 sorǵy stantsııasynda boldy. Іri ónerkásiptik kásiporyn - «Kazakhmys Coal» JShS jumysymen tanysty. Ol jyl saıyn halyqta Borlınskıı dep atalatyn shamamen 8 mıllıon tonna kómir shyǵarady. Al Trýdovoe aýylynda óńir basshysy kásiptik oqytý boıynsha oqý-óndiristik kombınatyna baryp qaıtty.