Osaka metrosynda aqaý shyǵyp, EKSPO-ǵa kelgender kete almaı qaldy

ASTANA.KAZINFORM — Osakadaǵy 2025 jylǵy Dúnıejúzilik kórme alańyna qyzmet kórsetetin jalǵyz metro jelisi sársenbi kúni elektr qýatynyń úzilýine baılanysty jumysyn toqtatyp, kóptegen kelýshilerdi tyǵyryqqa tiredi, dep habarlaıdy NHK World-Japan arnasy.  

Saǵat 21:30 shamasynda metro jelisi jumysyn toqtatty. Elektr qýatynyń óship qalý sebebi belgisiz.

Kórme ótetin jerge eń jaqyn stantsııa jabylyp, kóp adam shyǵa almaı qaldy.

Beısenbi kúni jergilikti ýaqyt boıynsha saǵat 1:30–da aıaǵy jaraqattanǵan bir adam jáne ózin nashar sezinip shaǵymdanǵan taǵy 33 adam aýrýhanaǵa jetkizilgeni habarlandy.

Úılerine qaıta almaǵan keıbir kelýshiler ýaqytsha baspana retinde ornatylǵan pavılondarda túnedi.

Osaka prefektýrasynyń úkimeti men kórmeni uıymdastyrýshylar sý men azyq-túlik úlestirdi.

NHK arnasynyń habarlaýynsha, kelýshilerdiń biri óziniń otbasymen birge kórmeniń sımvoly sanalatyn úlken aǵash qurylymnyń astynda uıyqtaǵanyn aıtty. Ol keıbir meıramhanalar men pavılondar áli jumys istep turǵanyn atap ótti.

2025 jylǵy Dúnıejúzilik kórmeniń Japonııa qaýymdastyǵy pavılondar beısenbi kúni saǵat 10:00–de ádettegiden bir saǵat kesh ashylatynyn habarlady.

Aıta keteıik, Qazaqstan Respýblıkasynyń Saýda jáne ıntegratsııa mınıstri Arman Shaqqalıev bastaǵan qazaqstandyq delegatsııa Osakadaǵy Dúnıejúzilik Expo 2025-tegi Qazaqstannyń Ulttyq kúni aıasyndaǵy is-sharalarǵa qatysý úshin resmı saparmen Japonııaǵa bardy.