Orys tilinde taralyp, qazaq tilinde sýbtıtrlengen ónim memlekettik tilge qatysty talapty oryndaǵan bolyp sanalmaıdy - L. Tanysbaı
ASTANA. 28 jeltoqsan. QazAqparat /Qanat Mámetqazyuly/ - Zań normalaryna sáıkes, orys tilinde taralyp, qazaq tilinde sýbtıtrlengen ónim memlekettik tilge qatysty talapty oryndaǵan bolyp sanalmaıdy.
Búgin QR Parlamenti Senatynyń jalpy otyrysynda «Teleradıo habarlaryn taratý týraly» Qazaqstan Respýblıkasy zań jobasy boıynsha baıandaǵan QR Baılanys jáne aqparat vıtse-mınıstr Lázzat Tanysbaı osylaı málimdedi.
Vıtse-mınıstrdiń aıtýynsha, vedomstvo tarapynan telearnalardaǵy memlekettik tilde habarlar taratýǵa qatysty monıtorıng júrgizip keledi. «Negizinen respýblıkalyq telearnalar memlekettik tilde habar taratýǵa qatysty zań normasyn saqtap otyr. Olardyń memlekettik tildegi usynatyn ónimderi 50 paıyzdan kem emes. Alaıda, jekemenshik arnalar memlekettik tilge qatysty 50 paıyzdyq úlesti saqtaý úshin ózderiniń ónimderin orys tilinde usynyp, qazaq tilinde sýbtıtr salady jáne osyny memlekettik tildegi ónim retinde usynyp, 50 paıyzdyq talapty sol arqyly jaýyp keledi. Bundaı olqylyq búgingi zań normalary arqyly joıylatyn bolady», - deıdi L. Tanysbaı. Onyń aıtýynsha, zań jobasynda tilge qatysty talap naqty kórsetiledi. Soǵan sáıkes, oryssha berilip qazaq tilinde sýbtıtrlengen ónim memlekettik tilge qatysty talapty oryndaǵan bolyp sanalmaıdy.
