Orys tili biz úshin kerek, biraq qazaq tiliniń mártebesi odan joǵary bolýy tıis - Elbasy
ASTANA. 7 naýryz. QazAqparat - Orys tili biz úshin kerek, biraq qazaq tiliniń mártebesi odan joǵary bolýy tıis. Búgin Aqordada 8 naýryz halyqaralyq merekesine oraı áıelder qoǵamdastyǵy ókilderimen kezdesken QR Prezıdenti N.Nazarbaev osylaı málim etti.
«Ana tili degen ár halyqtyń óziniń ishki dúnıesi, jany. Sol eldiń memlekettigin ana tili kórsetedi. Sol eldiń mádenıeti, sol eldiń dástúri barlyǵy da ana tilimen júredi. Sondyqtan da biz kishkene qıyn jaǵdaıda qalyp qoıǵan qazaq tilin kóteremiz dep, búkil memleket bolyp jumys istep jatyrmyz», - dep atap ótti Elbasy.
Memleket basshysy elimizdiń azamattary qazaq tiline qamqorlyǵyn bildirip, tıisti deńgeıde qoldaý kórsetilmeı jatyr degen renishterin bildiretindigin aıta kele, bul rette ózge ult ókilderiniń qazaq tilinde sóıleıtindikterine rızashylyǵyn bildirdi. Sonymen qatar Qazaqstanda qazaq tili erkin qanat jaıyp, búkil jurt erkin sóıleıtin dárejege jetken jaǵdaıdyń ózinde de ekinshi til qajet bolatyndyǵyn basa aıtty. Óıtkeni ǵylymı, ınnovatsııalyq máselelerdiń barlyǵynyń da ádebıettegi aýdarylýy aǵylshyn tilinen keıin orys tilinde júrgiziledi.
«Sondyqtan orys tili biz úshin árıne kerek, biraq qazaq tiliniń mártebesi odan joǵary bolýy qajet», - dep atap ótken Elbasy qazaqstandyqtardyń úshinshi til retinde aǵylshyn tilin erkin meńgerýi tıistigin basa aıtty.
Memleket basshysynyń alǵa tartqan derekterine qaraǵanda, sońǵy sanaqtyń nátıjesinde qazaqtardyń óziniń ishinde qazaqshaǵa shorqaqtary 20-25 paıyzǵa jetken. Degenmen, táýelsizdik alǵan jyldar ishinde qazaq tilinde bilim beretin mektepterdiń sany artyp, olarǵa baratyn qazaq balalarynyń sany 80 paıyzǵa jetti.
