Orys tili bilgirleri «Oı-sanada» baq synady (FOTO)
ASTANA. QazAqparat - Qazaqstan Respýblıkasy Mádenıet jáne sport mınıstrligi Tilderdi damytý jáne qoǵamdyq-saıası jumys komıteti jáne Sh. Shaıahmetov atyndaǵy Tilderdi damytýdyń respýblıkalyq úılestirý-ádistemelik ortalyǵy «Qazaqstan Respýblıkasynda tilderdi damytý men qoldanýdyń 2011-2020 jyldarǵa arnalǵan memlekettik baǵdarlamasy» aıasynda «Oı-sana» orys tili bilgirleriniń respýblıkalyq baıqaýyn ótkizdi.
Bul týraly Tilderdi damytý jáne qoǵamdyq saıası jumys komıtetiniń baspasóz qyzmeti habarlady.
Baıqaýdyń maqsaty - ultaralyq qarym-qatynas jaǵdaıynda belsendi kózqarastaryn qalyptastyrýǵa baǵyttalǵan shyǵarmashylyq bastamalaryn júzege asyrý, orys tilin erkin meńgergen daryndy jastardy anyqtaý jáne qoldaý.
Baıqaý eki kezeńge bólindi. І kezeń - úsh tapsyrma aıasynda, ІІ kezeń - «Shabyt juldyzy» bólimi men marapattaý rásiminen turdy. Saıysqa Qazaqstannyń túkpir-túkpirinen jınalǵan, orys tilin jaqsy biletin, saralanyp, óz mekeninde daralanyp kelgen úzdik 16 oqýshy qatysty.
Jańyltpashtan (І tapsyrma) jańylmaı ótip, dıalogta (ІІ tapsyrma) dara shapqan, «Esse jazý» bóliminde (ІІІ tapsyrma) áserli mátinimen erekshelenip, ozyq ıdeıa, teorııalyq saýattylyǵymen kózge ilinip, akterlik sheberligimen barsha qaýymdy, qazylar alqasyn tánti etken Shyǵys Qazaqstannyń úkilegen úmiti Ermuhanbetova Aqmaral Ermuhanbetqyzy bas júldeni qanjyǵasyna baılady. І oryn - qaraǵandylyq Tastýbaı Aıjan Sembaıqyzyna buıyrsa, ІІ oryn - Batys Qazaqstannan kelgen Amangeldınova Aıaýlym Edýardqyzyna, ІІІ orynmen almatylyq Isak Arý marapattaldy.
Qadirli qonaq retinde QR Májilis depýtattary Á.T. Bımendına men N. M. Petýhova, QR Reseı yntymaqtastyq ókildiginiń basshysy Vıktor Nefedov, Qazaqstan Orys qaýymdastyǵynyń basshysy ıÝrıı Býnakov, Qazaqstan Respýblıkasyndaǵy Reseı federatsııasy elshiliginiń keńesshisi E.V. Lysenko quttyqtaý sóz sóıledi.
Baıqaý sońy kontserttik baǵdarlamaǵa ulasty
