Orys tildi mekteptegi ár oqý saǵatynda shákirtter qazaq tilinde 3 sózden úırense, 10-shy synypqa deıin 4 myń 800 sóz bilýi tıis - A. Smaıyl
ASTANA. Jeltoqsannyń 9-y. QazAqparat /Qanat Mámetqazyuly/ - Eger orys tildi mekteptegi ár oqý saǵatynda shákirtter qazaq tilinde 3 sózden úırense, 10-shy synypqa deıin 4 myń 800 sóz bilýi tıis eken. Búgin QR Parlamenti Májilisiniń jalpy otyrysynda Bilim jáne ǵylym mınıstriniń atyna memlekettik til máselesin kóterip, saýal joldaǵan depýtat Aldan Smaıyl osylaı málim etti,
dep habarlaıdy QazAqparat.
«Qazirgi tańda respýblıkanyń orys tildi mektepterinde 1-shi synyptan 9-shy synypqa deıin qazaq tilinde 1 myń 600 saǵat oqytylady. Eger ár saǵatta shákirtter qazaq tilinde 3 sózden úırenip otyrsa, 10-shy synypqa kóshkenge deıin 4 myń 800 sóz bilýi tıis. Lıngvıst ǵalymdardyń dálelinshe, kez-kelgen tilde aıtar oıyńdy tolyq jetkizý úshin 3,5 myń sóz qory jetkilikti. Al bizdegi jaǵdaı - mektepterde qazaq tilin oqytýǵa bólingen saǵat durys anyqtalǵanymen, sol ýaqyttyń bilim oshaqtarynda talapqa saı paıdalanylmaıtynyn kórsetip tur», dedi A. Smaıyl.
Onyń aıtýynsha, bul bir jaǵynan qazaq tilin oqytýǵa degen muǵalim jaýapsyzdyǵyn ári oqýlyqtardyń sapasyzdyǵynyń belgisi. Bul rette depýtat shákirtterdiń memlekettik tildi bilý deńgeıin eshkimniń de tekserip otyrmaǵanyn alǵa tartady. «Mektep túlekteri úshin qazaq tili aldaǵy ýaqytta sonshalyqty qajet bolmaıtyndyǵy da olardyń yntasyna keri áserin tıgizip otyr. Qazaq tilin árbir qazaqstandyq órenniń mektepte erkin bilip shyǵýyna qol jetkizý kerek. Memlekettik tildiń mártebesin kóterý arqyly el birligin nyǵaıtýǵa yqpal etýdiń asa qajetti ári óreli joly osy. Sondyqtan da, atalǵan máseleni ýaqyt ozdyrmaı, memlekettik jaýapkershilikpen sheshý shart», dedi A. Smaıyl. Sonymen qatar, depýtat jastardyń mektepte úırengen tilin odan arǵy ómirinde tolyqtyra túsýge múmkindik beretin sharalardyń da oılastyrylýy qajettigin atap ótti. «Bul maqsatta qazaq tilin joǵary oqý oryndarynda, kásiptik bilim berý júıesinde qazirgideı bir jyl ǵana emes, barlyq kýrstarda úzbeı oqytý júıesi júzege asyrylsa ıgi», dedi ol.
