Orys mektebin bitirgen oqýshylarǵa da qazaq tilinde test tapsyrtqan jón - M. Qul-Muhammed
ASTANA. Naýryzdyń 19-y. QazAqparat /Qanat Mámetqazyuly/ - Orys nemese aralas mektepti bitirgen balalarǵa qazaq tilinde test tapsyrtatyn bolsaq, sonda orta mektepti bitiretin árbir balanyń qazaq tilin meńgerip shyǵaryna múmkindik jasar edik.
Búgin QR Parlamenti Májilisinde ótip jatqan «Memlekettik til - el birliginiń kepili» atty ǵylymı konferentsııa barysynda baıandama jasaǵan QR Mádenıet mınıstri Muhtar Qul-Muhammed osylaı málim etti, dep habarlaıdy QazAqparat.
«Orys jáne ózge ult ókilderi bilim alatyn mektepterdegi qazaq tilin oqytýdyń júktemesin arttyra túsý qajet. Búgingi kúni qazaq mektebin bitirgen túlek ulttyq birińǵaı testti qazaq tilinde erkin tapsyrady. Budan qazaq tiliniń kósegesi kógeretinine sóz joq. Biraq, biz orys mektebin bitirgen balalarǵa qazaq tilinde test tapsyrtatyn bolsaq, sonda orta mektepti bitiretin árbir balanyń qazaq tilin meńgerip shyǵaryna múmkindik jasar edik. Dál qazirgi kezde bundaı jaǵdaı bolmaı otyr, óıtkeni túlektiń erki boıynsha qazir qazaq tilinde bitirgen bala qazaqsha, orys tilinde bitirgen bala oryssha tapsyra beredi», dedi M. Qul-Muhammed.
Sonymen birge, mınıstr búgingi kúni ázirlenip jatqan memlekettik tildi damytý tujyrymdamasynda osy másele kórinis tabatynyna senim bildirdi. Sondaı-aq, ol joǵary oqý oryndaryndaǵy memlekettik til máselesine de toqtalyp ótti. Mınıstrdiń aıtýynsha, JOO-da qazaq tilin tek til retinde ǵana oqytýdan keletin paıda shamaly. Sol úshin árbir joǵary oqý ornynyń mamandyǵyna sáıkes termınologııany bilip shyǵýyna basa mán berý kerek. «Máselen, Almaty medıtsına ınstıtýtynda orys bóliminiń stýdentterine bir pán mindetti túrde qazaq tilinde oqytylady eken. Sonda stýdent pánge qatysty termınologııany meńgeredi degen sóz. Bundaı tájirıbege kóshý qajet», dedi M. Qul-Muhammed.
