«Orys balasy dombyra izdep júr» - respýblıkalyq basylymdarǵa sholý
***
«Memleket basshysy Nursultan Nazarbaev «Kazkommertsbank» AQ Dırektorlar keńesiniń tóraǵasy Nurjan Subhanberdındi qabyldady», - dep jazady «Egemen Qazaqstan» gazeti. Basylymnyń atap ótýinshe, N.Subhanberdın Prezıdentke «Qazkommertsbank» AQ damý qarqyny týraly baıandady jáne qarjy daǵdarysy jaǵdaıynda bankterge, shaǵyn jáne orta bızneske aıtarlyqtaı qarjylyq kómek kórsetýge múmkindik týǵyzǵan sheshimdi sharalar qabyldaǵany úshin alǵysyn aıtty. Kezdesý kezinde sondaı-aq qazaqstandyq kompanııalardyń shıkizattyq emes sektordaǵy borysh aýyrtpalyǵyn tómendetý týraly áńgime qozǵaldy.
Dál qazir búkil elimiz asa bir jaýapty belestiń aldynda tur. Ol belesten biz aldaǵy jeksenbide - 3 sáýirde ótemiz. Osy jaıt «Egemen Qazaqstan» gazetinde jarııalanǵan «Daýys berý - azamattyq paryz» degen maqalaǵa arqaý bolǵan. «Meniń daýysym ne ózgerte qoıady deısiń, basqalar barady ǵoı, solar daýysyn beredi ǵoı, másele durys sheshiledi ǵoı dep nemquraıdylyqqa salynar bolsaq, ózimizdiń qolymyzǵa tıip turǵan múmkindikten enjarlyǵymyz úshin ǵana aıyrylar bolsaq, munyń ózi eldigimizge bir syn. El isine aralasý, memleket bolashaǵynyń taǵdyryn sheshý, soǵan yqpal jasaý bizdiń bárimizge táýelsizdik berip turǵan syıdyń biri», - dep jazady maqala avtory Qyzylorda oblystyq qarjy basqarmasynyń bastyǵy Murat Ergeshbaev.
***
Keshe Syrtqy ister mınıstrliginde 2009 - 2012 jyldarǵa arnalǵan adam quqy jónindegi ulttyq is-qımyl josparynyń júzege asýy barysyn talqylaǵan dóńgelek ústel ótti. Osyǵan oraı «Aıqyn» gazetinde «On úsh myń adam bostandyqqa shyǵady» degen taqyryppen maqala basyldy. Basylymnyń atap ótýinshe, adam quqyn qorǵaý máselesine beıjaı qaraı almaıtyn vedomstvolar, ÚEU jáne dıpmıssııa ókilderi qatysqan basqosýda aldaǵy ýaqytta elimizde jazasyn ótep jatqan 13 myńdaı adamnyń bostandyqqa shyǵatyny aıtylǵan. QR Bas prokýrordyń orynbasary Iogan Merkel bosatylady degen 13 myńǵa jýyq adamnyń 2200-i bas bostandyǵynan aıyrý oryndaryndaǵy azamattar eken. Al 10600-i - bas bostandyǵynan aıyrý jazasyna qatysty emes sottalǵandar.
Osy basylymnyń dástúrli «Aq sóıle!» aıdarynda álemdik dárejedegi halyq emshisi Saılaýhan Áýelbaevamen aradaǵy suhbat «Halyq medıtsınasynyń onkologııalyq aýrýlardy túp-tamyrymen joıýyna qaýqary bar» degen taqyryppen berilgen. Basylym tilshisiniń barlyq saýaldaryna tuşymdy jaýap bergen ol: «Halyq medıtsınasynyń arnaıy dıagnostıkalyq ortalyqtary shetelde bar. Qazaqstanda ázirge mundaı tájirıbe joq. Kórshi Qytaıda da bul sharýa óte jaqsy damyǵan. Bizde joq, biraq bolsa bir halyq medıtsınasy emes, jalpy, el medıtsınasyn damytýdaǵy úlken serpin bolar edi. Halyq medıtsınasynyń dıagnostıkasy dástúrli medıtsınaǵa qaraǵanda, ári tıimdi, ári sapaly, ári artyq ýaqyt jáne qarajat shyǵynyn qajet etpeıdi», - deıdi.
***
«Ol qyryqtan astam shyǵarmany kıeli dombyramen naqyshyna keltire oryndaıdy. Onyń ishinde qudiretti qazaq kúıleri, áýezdi ánderi de bar. Biraq boıyndaǵy bar talantty qalyń jurtqa pash etkizýge qaýqary bolǵanymen, qoly qazaqtyń bir dombyrasyna jetpeı júr! Tókpe kúıdi tógiltip, shertpe kúıdi shegine jetkize shertýge Mıshanyń arnaıy kontsertke arnalǵan aspaby joq», - dep jazady «Alash aınasy» gazeti. Jazylǵan dúnıege arqaý bolǵan, qazaqtyń kıeli qara dombyrasyn janyna serik etken Mıhaıl Glazyrın jaıynda oqyp-bilgińiz kelse, «Orys balasy dombyra izdep júr» degen taqyryppen berilgen maqalaǵa kóz salyńyz.
«Qazaq fýtboly ÝEFA-dan Azııaǵa oralýy múmkin». «Alash aınasy» gazetiniń jazýynsha, bul jaıynda keshe Májilistegi halyq qalaýlylarynyń aldynda byltyr atqarylǵan jumystar men aldaǵy alar asýlar jaıynda eseptik baıandama jasaǵan QR Týrızm jáne sport mınıstri Temirhan Dosmuhambetov málim etken. «Qazaqstannyń fýtboly baıaǵydan álsiz. Bul - saıası-buqaralyq sport túri, sondyqtan basa nazar aýdaramyz. Qarjy jutylyp jatyr, alaıda nátıje joq. Bul rette men aldaǵy ýaqytta qazaqtyń fýtboly Eýropada emes, Azııa qurlyǵynda oınalǵanyn qalaımyn. Sonda ǵana biz udaıy jeńile bermeı, keıbir matchty utýǵa, tipti 1-orynnan 5 orynǵa deıingi aralyqta talasýǵa múmkindik alar edik», - depti mınıstr.
***
«Astana aqshamy» gazetiniń habarlaýynsha, Qazaqstannyń Premer-Mınıstri Kárim Másimov ınternet paıdalaýshylardy Twitter, Facebook, sondaı-aq, On.kz jáne Ilike.kz áleýmettik jelilerindegi óziniń resmı akkaýnttaryna shaqyrady. «Men Twitter, Facebook-ta, qazaqstandyq On.kz jáne Ilike.kz áleýmettik jelilerinde óz betterimdi ashyp aldym. Men áleýmettik jelilerdegi bul betterdi búkil álemdegi jáne Qazaqstandaǵy azamattarmen qarym-qatynas jasaý múmkindigi retinde qarastyramyn. Men sizdermen dıalogqa shyqqanyma qýanyshtymyn. Maǵan qosylyńyzdar!», - dep jazypty óz blogynda K.Másimov.
