Oryngúl Zkrıenova: Jeńil atletıka – jeńil sport emes
ÓSKEMEN. QazAqparat – Shyǵys Qazaqstannan shyqqan sporshylar bıik shyńdardy baǵyndyryp, baıraqty básekelerde el namysyn abyroımen qorǵap júr. Bolashaǵynan zor úmit kúttiretin jastar da az emes. Solardyń biri – kedergilermen júgirýden Qazaqstan kýboginiń ıegeri, Azııa chempıonaty men ýnıversıada qatysýshysy, sport sheberine úmitker Oryngúl Zkrıenova. QazAqparat tilshisi Óskemen qalasynyń týmasy bolǵan 22 jastaǵy jeńil atletpen suhbattasqan edi.
– Oryngúl, jeńil atletıkaǵa qalaı keldiń?
– Óskemendegi №16 mekteptiń 5-shi synybynda oqyp júrgenimde 500 metrge júgirýden qalalyq jarys ótetindigin estip, baǵymdy synap kórýge bel baıladym. Sol saıysta jeńimpaz atanyp, jattyqtyrýshy Nadejda Lýkashınanyń kózine tústim. Sóıtip ol kisi meniń alǵashqy bapkerim boldy. Jeńil atletıkaǵa alǵashqy qadamym osylaı jasaldy.
– Alǵashqy jetistigiń qandaı boldy?
– Jasóspirimder arasyndaǵy 300 metrge kedergilermen júgirýden Qazaqstan chempıonatynda ekinshi oryndy ıelendim. Araǵa jyl salyp dál osy jarysta úzdik atandym. Jaqsy nátıjelerimdi baıqaǵan bapkerler meni 2016 jyly Katardyń Doha qalasynda ótken Azııa chempıonatyna alyp bardy. Ókinishke qaraı, ol jaqta úshinshi orynǵa sál ǵana jetpeı qaldy. Osydan keıin Qazaqstan chempıonatyna qatysqanymda aıaǵym tartylyp, jaraqat alyp qaldym. Sonyń saldarynan Álem chempıonatyna bara almaı, uzaq ýaqyt emdelýime týra keldi. Al 2019 jyly Italııada bolǵan Ýnıversıadada baq synaǵanymda júldeli oryn buıyrmady.
– Osydan 2 jyl buryn Qazaqstan kýboginiń jeńimpazy atandyń. Sol saıys jaıly aıtyp ótseń…
– Shynymdy aıtsam, bul jeńisime kóńilim tolmady. Sebebi meniń negizgi qarsylasym pavlodarlyq Roksana Ospanova márege jete almaı qalǵandyqtan tartysty básekelestik baıqalmady. Báseke bolmaǵan jerde ósý bolmaıdy. Sondyqtan osyndaı jeńiske jetkende qýanyshtan tóbem kókke jetti dep aıta almaımyn.
– Kedergilermen júgirýde ózińniń jeke rekordyń qandaı?
– Qazir men sport sheberiniń normatıvin oryndaýǵa talpynyp júrmin. Ol úshin 60 metrdi kedergilermen 8,64 sekýndta júgirip ótý qajet. Bul qashyqtyqtaǵy ózimniń jeke rekordym – 8,8 sekýnd. Negizinen jeńil atletıka – jeńil sport emes. Kedergilermen júgirý úshin jyldamdyq emes, tehnıka kerek. Budan bólek shydamdylyq, tózimdilik pen eńbekqorlyqtyń da bolýy shart.
– Bos ýaqytyńda nemen aınalysqandy unatasyń?
– Sýǵa túskendi, taza aýada serýendegendi, án aıtqandy jaqsy kóremin. Biraq sportpen aınalysatyn adamnyń bos ýaqyty kóp bola bermeıdi. Búginde aǵylshyn tilin úırenýdi nıet etip júrmin.
– Alǵa qoıǵan josparlaryń qandaı?
– Qazirgi ýaqytta Almaty qalasyndaǵy Qazaq sport jáne týrızm akademııasynda magıstratýrada oqyp júrmin. Alda baǵyndyrýdy maqsat etken belesterim az emes. Bıylǵy Olımpıadaǵa jaraqattan keıin babyma durys kele almaǵandyqtan bara almaı qaldym. Keleshekte aýqymdy dodalarda el namysyn qorǵaǵym keledi. Sol úshin aıanbaı ter tógip, bar kúsh-jigerimdi salyp daıyndyq ústindemin. Maǵan árdaıym ata-anam, týǵan-týystarym men dos-qurbylarym qoldaý bildirip, jankúıer bolýda. Sol úshin olarǵa sheksiz alǵysymdy aıtamyn. Sizderdiń úmitterińizdi aqtaý úshin boıymdaǵy bar múmkindigimdi sarqa jumsaýǵa ázirmin!
– Suhbatyńyzǵa raqmet. Alar asýyńyz bıik bolsyn!
