Oryndalǵan qujattar sany 45 paıyzǵa artty – Ádilet mınıstrligi

NUR-SULTAN. QazAqparat – Atqarýshylyq is júrgizý týraly zańǵa túzetýler engizilgennen bastap, oryndalǵan qujattar sany 45 paıyzǵa artty. Bul týraly halyqqa onlaın rejımde esep berý kezdesýinde Ádilet mınıstri Marat Beketaev málim etti, dep habarlaıdy QazAqparat tilshisi.

«Sot aktilerin oryndaýǵa toqtalsaq, bul baǵyt ádilet organdary qyzmetiniń mańyzdy salalarynyń biri bolyp qala beredi. Sot aktilerin oryndaýdyń tıimdiligin arttyrýǵa baǵyttalǵan atqarýshylyq is júrgizý týraly zańǵa túzetýler qabyldandy. Qoldanystaǵy zańnamany buzǵany úshin jeke sot oryndaýshylarynyń jaýapkershiligi qatańdatyldy, sonymen birge jeke sot oryndaýshylarynyń Respýblıkalyq palatasynyń ókilettikteri kúsheıtilip, keńeıtildi. Qabyldanǵan zańnamalyq sharalar naqty oryndalǵan qujattar sanynyń 45 paıyzǵa artýyna yqpal etti», - dedi M. Beketaev.

Sot aktisin oryndaýǵa naqty múmkindigi bolmaı otyrǵan mán-jaılardyń tolyq tizbesin aıqyndaıtyn ózgerister engizildi.

«Birneshe jyl boıy júrgizilip jatqan dáıekti reforma jáne atqarýshylyq is júrgizýdiń elektrondyq formatqa kóshýi óziniń qabilettiligin kórsetti. Tótenshe jaǵdaı kezeńinde atqarýshylyq is júrgizý organdarynyń avtomattandyrylǵan aqparattyq júıesi májbúrlep oryndaý sharalaryn úzdiksiz qabyldaýǵa jaǵdaı jasady. Halyqqa atqarýshylyq is júrgizý taraptarynyń kabıneti arqyly atqarýshylyq qujattardy onlaın rejımde berý múmkindigi berildi», - dedi mınıstr.