Orynborlyq jáne batysqazaqstandyq ǵalymdar Oralda bas qosty
ORAL. QazAqparat - Orynborlyq jáne batysqazaqstandyq ǵalymdar Oralda bas qosty, dep habarlaıdy «QazAqparat» tilshisi.
«Reseı men Qazaqstannyń shekaralas aımaqtarynyń mádenı murasy» degen taqyrypta ótken halyqaralyq konferentsııada Qazaqstan halqy BQO assambleıasy tóraǵasynyń orynbasary, hatshylyq meńgerýshisi Ǵaısa Qapaqovtyń atap ótkenindeı, kórshiles óńirlerde ejelden mıdaı aralasqan qos halyqqa ortaq mádenı muralar az emes. Sonyń ishinde Orynbor oblysynda qazaq halqynyń tarıhyna qatysty qasıetti oryndar jetkilikti. Kezinde Qazaqstan astanasy bolǵan Orynborda memleket qaıratkerleri men Alash arystarynyń aıshyqty izi qalǵany belgili, tarıhı ǵımarattar da barshylyq. Sonymen qatar oblys aýmaǵynda ejelgi qorymdar men qorǵandar, kóne qulpytastar az kezdespeıdi. Bulardy orynborlyq ǵalymdarmen birlese zertteýdiń mańyzy zor. Mundaı jumystar «Rýhanı jańǵyrý» baǵdarlamasynyń maqsat-múddesimen tolyq úndesedi.
Orynbor oblysy mádenıet jáne syrtqy baılanystar mınıstriniń orynbasary - halyqaralyq yntymaqtastyq basqarmasynyń bastyǵy, fılosofııa ǵylymdarynyń kandıdaty Aleksandr Kalının Orynbordaǵy Qazaqstan tarıhyna qatysty ǵımarattardyń jaqsy saqtalyp otyrǵanyn, mádenı muralardy mamandardyń qatysymen jan-jaqty zertteý jumystaryn qolǵa alýdyń mańyzdylyǵyn jetkizdi.
Konferentsııada sondaı-aq QR UǴA qurmetti akademıgi, tarıh ǵylymdarynyń doktory, professor, BQO tarıh jáne arheologııa ortalyǵynyń dırektory Murat Sydyqov, tarıh ǵylymdarynyń doktory, Q.Jubanov atyndaǵy Aqtóbe óńirlik memlekettik ýnıversıtetiniń ǵylym jáne ınnovatsııalar jónindegi prorektory Rahym Beknazarov, Bókeı ordasy tarıhı-mýzeılik kesheniniń dırektory Ǵaısa Mahımov jáne basqalar mádenı mura eskertkishterine qatysty óz oı-tolǵamdaryn bildirdi. Mysaly, Ábilqaıyr hannyń zaıyby, ataqty Bopaı hanymnyń zıraty Orynbor oblysy aýmaǵynda jatqany málim. Sondaı-aq muraǵattarda Qazaqstanǵa qatysty áli tolyq beti ashylmaǵan derekter qanshama.
«DANAqaz» tarıhı-tanymdyq jýrnalynyń bas redaktory, respýblıkalyq «Egemen Qazaqstan» gazetiniń BQO boıynsha menshikti tilshisi Qazybek Qabjan Reseıdiń kórshiles aımaqtaryndaǵy arab jazýly qulpytastardy joıylyp ketpeı turǵanda, esepke alyp, sýretke túsirip, barynsha zertteý qajettigin atap ótti. Sonda qazaq halqynyń san ǵasyrlyq tarıhy túgendele túseri sózsiz.
Orynborlyq jáne batysqazaqstandyq ǵalymdar budan bylaı da birlesip jumys jasaýǵa ýaǵdalasty.
