Orynborlyq qazaq qarsylasyn nokaýtqa túsirip, álem chempıony atandy
ASTANA. QazAqparat - Aralas jekpe-jekten reseılik faıter, orynborlyq qazaq Damır Ysmaǵulov 70,2 keli salmaqta M-1 Global chempıony atandy. Ol M-1 Challenge 78 týrnıriniń tıtýlǵa talas jekpe-jeginde otandasy Maksım Dıvnıchti tehnıkalyq nokaýtpen jeńdi, dep jazady Massaget.kz.
Jekpe-jek bes mınýttan bes raýnd formatynda ótti. Referı jekpe-jektiń aıaqtalýyna 15 sekýnd qalǵanda toqtatty. Bul kezde Ysmaǵulovtyń qarsylasy soqqyǵa belsendi qorǵanys tanyta almaǵan edi.
26 jastaǵy Ysmaǵulov mansabyndaǵy 12-shi jeńisine qol jetkizdi. Onyń eki jeńilisi bar.
Damır Ysmaǵulov Orynborda týyp-ósken jáne jergilikti "Boets" klýbynyń ókili. Ol Aralas jekpe-jekten Dúnıejúzilik assotsıatsııasynyń Azııalyq dıvızıonynda ótip júrgen "Nomadtar shaıqasy" kásipqoı týrnırinde talaı márte top jarǵan.
Aralas jekpe-jekten keıbir týrnırlerde ol Qazaqstannyń atynan da shyqqan. Al M-1 Global týrnırinde Ysmaǵulov Reseı azamaty retinde tirkelgen.
Jekpe-jek aıaqtalǵannan keıin bergen suhbatynda Damır kórermenderge, bapkerlerge, týystaryna jáne qazaqstandyq jankúıerlerine alǵys bildirdi.
"Búgingi jeńisimmen 60 aýlasy bar, ınternetsiz aýyldan shyqqan balanyń álem chempıony bola alatynyn dáleldedim. Meniń qolymnan kelse, sizderdiń de qoldan keledi. Bul óskeleń urpaqqa úlgi bolsyn. Bul bizdiń jeńisimiz. Qazaqstandaǵy aǵaıynǵa alǵys. Bul keremet qoldaý. Olar meni qoldaýǵa keldi. Salamaleıkým, Qazaqstan. Zor alǵys bildiremin", - dedi sportshy.
