Orynbordaǵy iri jol apatynda birneshe aqtóbelik qaza tapty
AQTÓBE. QazAqparat - «Orynbor - Sol-Iletsk» tasjolynda iri jol apaty boldy. Zardap shekkender men qaza bolǵandar arasynda Qazaqstan azamattary, onyń ishinde aqtóbelikter bar, dep habarlady Tótenshe jaǵdaılar komıtetiniń baspasóz qyzmeti.
Búgin «Orynbor - Sol-Iletsk» tasjolynda iri jol apaty boldy. Aldyn ala belgili bolǵany, 5 adam qaza taýyp, 2 adam túrli dene jaraqatymen aýrýhanaǵa tústi.
«Saǵat 13:50-de Aqtóbe oblystyq TJD-ne Orynbor oblysynyń 52 shaqyrymynda jol apaty bolǵany týraly habar tústi. Oqıǵa «Orynbor - Sol-Iletsk» tasjolynyń Elshanka aýyly mańynda boldy. Jol-kólik oqıǵasy kezinde júk kóligi men «Volkswagen» soqtyǵysyp, 5 adam qaza tapty. Taǵy eki adam Sol-Iletsk qalasyndaǵy aýrýhanaǵa jetkizildi. Reseıdegi tótenshe jaǵdaılar mınıstrliginiń Orynbor oblystyq ókildigi mert bolǵandar men jaraqat alǵandar arasynda Qazaqstan azamaty bar ekenin aıtty», - dep habarlady TJK baspasóz qyzmeti.
Aıta keteıik, qazir Aqtóbe oblystyq TJD-i jedel jelini iske qosty. Baılanys tel: 8 (7132) 24-23-65 jáne 70-38-16. Aldyn ala málimet boıynsha jol apaty kezinde qaza tapqan adamdardyń bári Aqtóbe oblysynyń týmasy.
