Orynborda ótip jatqan qazaq kúresinen álem chempıonatynda qazaqstandyq bes palýan jeńimpaz atandy
ASTANA. QazAqparat - Reseıdiń Orynbor qalasynda ótip jatqan qazaq kúresinen álem chempıonatynda qazaqstandyqtar bes altyndy enshiledi.
Atap aıtqanda, bul dúbirli dodada «Qazaqstan barysy» tıtýlynyń ıegeri jáne álem chempıony Muhıt Tursynov absolıýtti salmaq dárejesinde jeńiske jetti. Qazaqstan quramasynyń kóshbasshylarynyń biri germanııalyq Lezık Varbıtskısten basym tústi. Ekinshi jekpe-jeginde ol qyrǵyzstandyq Tilek Quralovty jeńdi, al jartylaı fınalda armıandyq Artem Grıgorıannan mereıi ústem boldy. Fınaldyq jekpe-jektiń negizgi ýaqytynda jeńimpaz anyqtalmasa da, belbeýlik kúreste Muhıt tájikstandyq palýan Komronshah Ýstorıpıonnan kúshiniń nyq ekenin baıqatty, sóıtip, ol álem chempıony atandy. Aıta keteıik, osy ýaqytqa deıin bul álem chempıonatynda Qazaqstan qorjynyna palýandar Aıdos Seıpiluly (55 kelige deıingi salmaq dárejesinde), Ǵanı Keldiqulov (60 keli), Ǵalymjan Ábdirahmanov (70 keli), Toqtar Qarkátenov (80 keli) jáne Aıbek Nuǵymarov (90 keliden artyq) altyn júlde saldy, dep habarlaıdy Vesti.kz.
Esterińizge sala keteıik, 5-7 jeltoqsan aralyǵynda Orynbor qalasynda qazaq kúresinen V álem chempıonaty ótip jatyr. Qazaq kúresinen baıraǵyn jelbiretkeli jatqan besinshi álem chempıonatyna Qazaqstan quramasynan ózge Avstrııa, Vengrııa, Germanııa, Grekııa, Úndistan, Iran, Ispanııa, Italııa, Qytaı, Latvııa, Lıtva, Mońǵolııa, Reseı, Túrkııa, Frantsııa, Fınlıandııa, Shvetsııa, Estonııa jáne basqa da elderdiń palýandary qatysýda.
