Orynborda qazaq kúresinen V álem chempıonaty ótedi
ASTANA. QazAqparat - 5-7 jeltoqsan aralyǵynda Orynbor qalasynda qazaq kúresinen V álem chempıonaty ótedi, dep habarlady www.24.kz.
Doda qazaq eliniń tuńǵysh astanasy bolǵan Orynbor qalasynda Eýrazııalyq ekonomıkalyq odaqtyń qurylýy qurmetine oraı ótkeli jatyr. Qazaq kúresinen baıraǵyn jelbiretkeli jatqan besinshi álem chempıonatyna Qazaqstan quramasynan ózge Avstrııa, Vengrııa, Germanııa, Grekııa, Úndistan, Iran, Ispanııa, Italııa, Qytaı, Latvııa, Lıtva, Mońǵolııa, Reseı, Túrkııa, Frantsııa, Fınlıandııa, Shvetsııa, Estonııa jáne basqa da elderdiń balýandary qatysady. Orynbor boz kileminde el namysyn Aıdos Sepyuly (55 keli), Ǵaını Keldiqulov (60 keli), Ǵalymjan Ábdirahmanov (70 keli), Toqtar Qarqaterov (80 keli), Maqsat Isaqabylov (90 keli) jáne Aıbek Nuǵymarov (+90 keli) qorǵaıdy. Sonymen qatar 2014 jylǵy «Qazaqstan barysy» Muhıt Tursynov absolıýtti salmaq dárejesinde beldesetin bolady. Bul dodanyń basty favorıtteriniń biri de - otandastarymyz. Reseı quramasy da eki altyn medal alýdy josparlap otyr eken. Birinshi orynnan kóringen sportshyǵa 2000 AQSh dollary berilse, ekinshi oryn alǵan balýanǵa - 1 000 AQSh dollary, úshinshi oryndy ıelengen boz kilem sheberi 500 AQSh dollaryn ıelenedi. Aıta keteıik, 22 qarasha kúni qazaq kúresinen Taraz qalasynda «Eýrazııa barysy» halyqaralyq týrnıri ótken bolatyn. Otandastarymyz fınaldyq beldesýlerde mońǵol balýandaryna ese jiberip, ekinshi orynnan kóringen-di.
