Orynborda Egemen Qazaqstan gazetiniń 100 jyldyǵy toılandy
«Egemen Qazaqstan» gazetiniń alǵash 1919 jyly jeltoqsanda Orynborda «Ushqyn» degen atpen shyqqany belgili.
Osyǵan oraı «Egemen Qazaqstan» respýblıkalyq gazeti» AQ basqarma tóraǵasy Darhan Qydyráli bastaǵan delegatsııa Qazaqstan men basylym tarıhyna qatysy bar tarıhı oryndarmen tanysty.
Sodan keıin N.Krýpskaıa atyndaǵy Orynbor oblystyq ámbebap kitaphanasynda gazettiń mereıtoıyna oraı dóńgelek ústel otyrysy ótti.
Ony ashqan Orynbor oblysy mádenıet jáne syrtqy baılanystar mınıstri orynbasarynyń mindetin atqarýshy - halyqaralyq yntymaqtastyq basqarmasynyń bastyǵy Aleksandr Kalının gazettiń 100 jyldyq mereıtoıymen quttyqtap, Orynbordyń Qazaqstannyń kórshiles oblystarymen tyǵyz baılanys ornaǵanyn, onyń aldaǵy ýaqytta da jalǵasa beretindigin atap ótti.
Qazaqstan Respýblıkasynyń RF-daǵy Elshiliginiń keńesshi-ýákili Janar Kolbachaeva sóz alyp, Qazaqstannyń Reseıdegi Tótenshe jáne ókiletti elshisi Imanǵalı Tasmaǵambetovtiń quttyqtaý hatyn Darhan Qydyrálige tabys etti.
Darhan Qýandyquly «Ushqynnan» bastaý alǵan «Egemenniń» elaralyq gazetke aınalǵanyn, basylymnyń ǵasyrlyq toıy Semeıde bastalyp, Qazaqstannyń barlyq óńiri men elordada atalyp ótip, Orynborda aıaqtalǵaly otyrǵanyn jetkizdi.
«Katalogqa engendikten, gazetimizge endi Reseı jerindegi, sonyń ishinde Orynbordaǵy oqyrmandarymyz da jazyla alady. Sońǵy jyldary izdenis jumystary nátıjesinde «Ushqyn» redaktsııasy ornalasqan tarıhı ǵımarat anyqtaldy. Reseıdegi elshimiz Imanǵalı Nurǵalıulynyń tikeleı qoldaýymen osy ǵımaratqa bolashaqta eskertkish taqta ornatý jóninde kelisimge qol jetkizip otyrmyz. Muny Orynbor qalasynyń ákimshiligi de qoldap otyr. Sonymen qatar arnaıy delegatsııa jibergen Batys Qazaqstan oblysy basshylyǵyna rızashylyǵymyzdy bildiremiz», dedi D.Qydyráli.
Jıynda «Sodrýjestvo narodov Rossıı» avtonomdyq kommertsııalyq emes uıymynyń sarapshysy, Orynbor memlekettik ýnıversıteti Ońtústik Ýral tarıhy men etnografııasy ǵylymı-zertteý ınstıtýtynyń aǵa ǵylymı qyzmetkeri Konstantın Morgýnov qazaqtyń basshy kadrlaryn daıarlaý men keńes ıntellıgentsııasyn qalyptastyrýdaǵy Orynbor rabfaginiń róline toqtaldy.
BQO máslıhatynyń hatshysy Málik Qulshar kórshiles jatqan qos óńirdiń yntymaqtastyǵy arta beretinine senim bildirdi.
Aqyndar, Memlekettik syılyqtyń laýreaty Nesipbek Aıtov pen Baýyrjan Halıolla el gazetine arnaǵan óleńderin oqyp berdi.
Otyrys sońynda «Egemen Qazaqstan» men Orynbor qazaqtary qaýymdastyǵy arasynda ózara yntymaqtastyq jónindegi memorandýmǵa qol qoıyldy.
Foto: Erlan Omarov
