Orynbor oblysynda sarmat altyny tabyldy
ORYNBOR. 12 tamyz. QazAqparat - Orynbor oblysynda Jaıyq pen Elek ózenderiniń toǵysyndaǵy Elek aýdanynyń aýmaǵynda І Fılıpp qorǵan-beıitinde arheologııalyq ǵylymı-zertteý jumystary aıaqtalyp keledi.
Prıýral arheologııalyq ekspedıtsııasy jumysynyń nátıjesinde baı zattyq materıaldarmen birge kómilgen áıel adamnyń beıiti tabyldy.
Orynbor úkimetiniń baspasóz qyzmeti habarlaǵandaı, atap aıtqanda 100-den astam altyn áshekeıler tabylǵan, olardyń arasynda altyn sapty qola aına, shytyra monshaq, súıekten jasalǵan qasyq, qońyraý jáne alqa túrindegi altyn shashaqtar jáne basqa da kóptegen qundy jádigerler bar.
«Tabylǵan olja Orynbor gýbernatorlyǵynyń tarıhı-ólketaný muraıjaıynyń kollektsııalaryn tolyqtyrady jáne jaqyn arada orynborlyqtar men oblys ortalyǵynyń qonaqtary kóre alady», - dep atap kórsetilgen habarlamada.
Eske sala keteıik, І Fılıpp qorǵan-beıiti Orynbor oblysynyń Elek aýdanynda Jaıyq pen Elek ózenderiniń toǵysynda ornalasqan. Onda HH ǵasyrdyń basynda arheolog S.I.Rýdenko, keıinnen keńestik kezeńde belgili sarmat zertteýshisi K.F.Smırnov zertteýler júrgizgen.
