Orynbek Jáýtikovtyń 100 jyldyǵyna arnalǵan poshta markasy shyǵaryldy
ALMATY. 15 qyrkúıek. QazAqparat /Názıra Eleýhan/ - Búginnen bastap elimizde ǵalym, fızıka-matematıka ǵylymdarynyń doktory, professor, Qazaqstan Ǵylym akademııasynyń akademıgi, Qazaqstannyń eńbek sińirgen ǵylymı jáne tehnıka qaıratkeri, Qazaqstannyń Memlekettik syılyǵynyń laýreaty Orynbek Jáýtikovtyń týǵanyna 100 jyl tolýyna arnalǵan poshta markasy aınalymǵa shyqty.
Markada Orynbek Jáýtikovtyń portreti beınelengen. Sýretshisi - Nıkolaı Sokolov. Markanyń jalpy tırajy 30 myń dana, kólemi- 28h30 mm. Marka «Belarýs baspa úıi» baspahanasynda basylǵan.
Jáýtikov Orynbek Ahmetbekuly (1911-1989) - Qaraǵandy oblysy Aqtoǵaı aýdanynyń Qyzylaraı aýylynda dúnıege kelgen. 1920-1930 jyldary aýyldyq mektepte, keıinnen Qarqaraly qalasyndaǵy mektepte oqyǵan. 1934 jyly Qazaq pedagogıkalyq ınstıtýtynyń (Abaı atyndaǵy Qazaq Ulttyq pedagogıkalyq ýnıversıteti) fızıka-matematıka fakýltetin úzdik bitirip, Lenıngrad memlekettik ýnıversıtetiniń (Sankt-Peterbor memlekettik ýnıversıteti) aspırantýrasyn tamamdaǵan.
Onyń negizgi ǵylymı eńbekteri qozǵalystyń ornyqtylyq teorııasyna, matematıka, fızıka teńdeýlerine, dıfferentsıaldyq teńdeýlerdiń sheksiz júıelerine, teorııalyq jáne qoldanbaly mehanıkaǵa, matematıka tarıhy men onyń metodologııasyna arnalǵan.
O.Jáýtikov - respýblıkalyq fızıka-matematıka mektebin uıymdastyrýshylardyń biri. Bul mektep qazir Orynbek Jáýtikovtiń esimimen atalady. Ol respýblıkamyzda matematık ǵalymdardy daıyndaýda jáne matematıkany nasıhattaýda kóp eńbek sińirip, otandyq matematıkter mektebin qalyptastyrdy. 1958 jyly akademık O.Jáýtikov alǵash ret qazaq tilinde matematıkalyq taldaý týraly oqýlyǵyn shyǵarǵan. Ol 200 den astam ǵylymı eńbekterdiń, ǵylymı-tanymdyq kitaptardyń, metodıkalyq jumystardyń, kóptegen oqýlyqtardyń avtory.
Orynbek Ahmetbekuly Almaty qalasynda oqýshylardyń Kishi ǵylymdar akademııasyn uıymdastyryp, akademııanyń kóp jyldar boıy Qurmetti prezıdenti boldy.
O.Jáýtikov matematıka ǵylymyn damytýǵa jáne fızıka-matematıka bilimderin jetildirýde zor úles qosyp, ǵylymı-pedagogıkalyq kadrlardy daıarlaǵany úshin Oktıabr revolıýtsııasy, 2 ret «Qurmet Belgisi» ordenderimen, kóptegen medaldarmen, Qazaq KSR Joǵarǵy Keńesi Prezıdıýmynyń Qurmet gramotalarymen marapattalǵan.
