Orynbek Sın: Qazaq tili ana sútimen daryǵan
Orynbektiń ákesi Sergeıdiń ulty - káris, anasy - Jalǵaskúl - qazaq. Ekeýi otaý kóterip, búginde alty balany dúnıege ákeldi. Solardyń biri - Orynbek jastaıynyn ónerli bolyp ósti. Shýaqty shańyraqtyń tórtinshi perzentiniń esimin naǵashy atasy qoıǵan kórinedi. «Ol ómirde óziniń orny bar adam bolsyn degen nıetpen qoıylǵan» deıdi jas ónerpaz.
Bala kezinen áýelete án shyrqaǵandy jany qalaıtyn Orynbek kóptegen mýzykalyq aspaptardy sheber meńgergen. Olardyń árbirimen quıqyljyta án oryndap, kópshiliktiń yqylasyna bólenip keledi. Qazaqtyń ulttyq mýzykalyq aspaby - dombyrany da sheber meńgergen. Aýyldaǵy mektepti oqyp júrgende alǵash ret sahnaǵa Jaıaý Musanyń «Aq sısa» ánimen shyqty. Sol sátte kópshiliktiń erekshe yqylasyna bólengeni áli este.
Búgingi tańda Qyzylorda qalasyndaǵy M.Mámetova atyndaǵy kolledjinde bilim alyp jatqan ol dombyramen qazaqtyń halyq ánderin sheber oryndaıdy. Ol «Syr-Orda» óner trıosy quramynda talaı mádenı sharalarǵa qatysyp júr. Oǵan Orynbek jetekshilik etedi. Qasynda Ádiljan Káribaev pen Saılaý Madııar sekildi ónerpaz jastar bar. Óner trıosy eki jyl buryn qurylǵan. Ónerpazdar baıan, dombyra, gıtaramen talaı shyǵarmany joǵary deńgeıde oryndaı alady.
«Ultym – káris bolsa da, qazaqtyń halyq ánderin aıtqandy jaqsy kóremin. Shyndyǵynda, koreı tilin múlde koreı tilin bilmeımin. Qazaq tili ana sútimen daryǵan. Qazaq tilin erekshe qurmetteımin. Qazirge deıin túrli baıqaýlarda jeńimpaz atandym. Qaıyrymdylyq kontsertterge de qatysyp kelemin», - deıdi ol.
Onyń aıtýynsha, dombyra tartýdy ónerdegi aǵasy Erbol Saǵynbaıulynan úırengen. Endi qazaqtyń kúılerin meńgersem deıdi. Sol arqyly úlken sahnadan kórinsem degen maqsaty bar. Sondyqtan bos ýaqytynyń barlyǵyn óziniń bilimin jetildirýge arnaıdy. Orynbek bı ónerine de qyzyǵady. Ulttyq bılerdi óz naqyshynda oryndap, talaı márte juldyzy jarqyraı tústi.
