Orynbasary jemqorlyqpen ustalǵan Qurmanǵazy aýdanynyń ákimi otstavkaǵa berdi

ATYRAÝ. QazAqparat - Qurmanǵazy aýdany ákiminiń orynbasary Órken Tájibaevqa qatysty sotqa deıingi tergeý aıaqtaldy. Ol aýdandyq sottyń úkimimen memlekettik qyzmette qyzmet atqarý quqyǵynan ómir boıy aıyryldy jáne 2 750 000 mólsherinde aıyppul tóleıtin boldy, dep habarlaıdy QazAqparat Atyraý oblysy Sybaılas jemqorlyqqa qarsy is-qımyl agenttigine silteme jasap.

3 shildede sot Atyraý oblysy Qurmanǵazy aýdany ákiminiń burynǵy orynbasary Órken Tájibaevqa úkim shyǵardy. Ol bılikti asyra paıdalandy, kásipkerlik qyzmetke zańsyz qatysý jáne alaıaqtyq jasady dep aıyptaldy.

Máselen, Tájibaev týysqandaryna tirkelgen JShS jáne JK basqarmasyna artyqshylyqtar bergen, balyqshy kúnine arnalǵan is-sharany ótkizý syltaýymen JShS quryltaıshysynyń 150 myń teńge mólsherindegi aqshalaı qarajatyn ıemdegen. Sondaı-aq óndiristik kooperatıvterdiń birine 500 myń teńge zııan keltirdi. Munymen qosa aýdannyń az qamtylǵan azamattary úshin qorǵanys medıtsınalyq maskalaryn satyp alýǵa qarjylyq kómek kórsetý syltaýymen kásipkerlerdiń jalpy somasy 125 myń teńge aqshalaı qarajatyn jymqyrǵan.

Nátıjesinde eks-sheneýnikke 2 mln 750 myń teńge kóleminde aıyppul salyndy. Ol memlekettik qyzmette qyzmet atqarý quqyǵynan ómir boıyna aıyryldy.

«Memlekettik qyzmet jáne sybaılas jemqorlyqqa qarsy is-qımyl máseleleri boıynsha Qazaqstan Respýblıkasynyń keıbir zańnamalyq aktilerine ózgerister men tolyqtyrýlar engizý týraly» Zańnyń jańa redaktsııasyna sáıkes birinshi basshy aıyptaý úkimi kúshine engennen keıin 10 kúntizbelik kún ishinde otstavkaǵa ketýge mindetti.

Osyǵan baılanysty, aǵymdaǵy jyldyń 8 qyrkúıeginde Qurmanǵazy aýdanynyń ákimi Q.Nurtaev qol astyndaǵylarǵa qatysty sybaılas jemqorlyq janjalynan keıin otstavkaǵa ketti, dep habarlady brıfıngte Sybaılas jemqorlyqqa qarsy is-qımyl agenttiginiń Atyraý oblysy boıynsha departamentiniń birinshi orynbasary A. Mamytov.