Órttiń sebebin anyqtaý boıynsha arnaıy komıssııa jumys isteıdi — oblys ákimi Ashat Shaharov
AQTÓBE. KAZINFORM — Oblys ákimi Ashat Shaharov keshe bolǵan órtke baılanysty, qazirgi jaǵdaıy týraly málimdeme jasady.
— Qurmetti oblys turǵyndary! Keshe oblystyq ákimdik ǵımaratynda bolǵan órt tolyq sóndirildi, jaǵdaı turaqty jáne baqylaýda. Taǵy aıtaıyn, eń bastysy — zardap shekkender joq, medıtsınalyq kómekke eshkim de júginbedi. Qazirgi ýaqytta arnaıy komıssııa órttiń sebepterin anyqtaýda. Bul másele meniń jeke baqylaýymda, jedel shtab jumysy jalǵasyp jatyr. Qazirgi tańda naqty is-qımyl jospary bekitilip, barlyq jumys kezeń-kezeńimen júrgizilip jatyr. Birinshiden, ǵımarattyń tehnıkalyq jaǵdaıyn tolyq baǵalaý úshin sarapshylar tartyldy. Aıtyp óteıin ǵımarattyń tek shatyry ǵana jandy. Altynshy qabattaǵy kabınetterge kelgen zaqym aıtarlyqtaı emes. Biz sońǵy ret ákimdikke 2022 jyly jóndeý júrgizdik, onyń ishinde tek jumys kabınetteri jańalandy. Ekinshiden, tústen keıin, mamandardyń kóp bóligi óz jumys oryndaryna oralady. Oǵan deıin memlekettik qyzmetter onlaın, úzdiksiz kórsetiledi. Úshinshiden, órttiń sebepterin anyqtaý boıynsha arnaıy komıssııa jumys isteıdi. Іs qozǵaldy, tergeý amaldary júrgizilýde. Tórtinshiden, qalpyna keltirý jumystarynyń naqty jospary ázirlenip jatyr. Ár kezeńniń oryndalýy meniń jeke baqylaýymda bolady, aqparat turaqty túrde jarııalanyp otyrady, — dedi ol.
Aıta keteıik, Aqtóbe oblysy ákimdigi búgin qashyqtan jumys isteıdi. Qazirgi kezde polıtsııa qyzmetkerleri ákimdik ǵımaratyn qorshaýǵa alǵan.
