Órttiń shyǵý sebebi ár túrli, biraq zardaby aýyr - QR TJM
ASTANA. 15 qarasha. QazAqparat - Astanada beısenbi kúni birneshe otbasy turatyn baraq úlgisindegi turǵyn úıdiń ekinshi qabatynda 25 sharshy metr aýmaqta órt shyqty,
dep habarlady QR TJM. Órt bir saǵattan keıin sóndirildi. Ony aýyzdyqtaýǵa QR TJM Astana qalasynyń TJD órt sóndirý qyzmetiniń 4 tehnıkasy men jeke quramnyń 25 adamy jumyldyryldy. 3 adam qaýipsiz jerge shyǵaryldy. Oqıǵa ornynan 34 jastaǵy er adamnyń máıiti tabyldy. Al tunshyqtyrǵysh gazǵa ýlanǵan onyń 40 jastaǵy týysy aýrýhanaǵa jatqyzyldy.
Dál osy ýaqytta Soltústik Qazaqstan oblysynyń Aqtúıesaı aýylynda gaz ballonyn tekserý kezinde gaz jarylyp, onyń arty órtke ulasty. Órt 7,5 saǵattan keıin sóndirildi. Oǵan qarsy QR TJM Soltústik Qazaqstan oblysy TJD órt sóndirý qyzmetiniń 1 tehnıkasy men jeke quramnyń 5 adamy jumyldyryldy. 102 sharshy metr jer otqa orandy.
Oqıǵa ornynan 81 jastaǵy áıeldiń máıiti tabyldy. Kúıik shalǵan 16 jastaǵy qyz ben 6 jasar bala aýrýhanaǵa jatqyzyldy.
Almaty oblysynyń Taýsamaly aýylynda qatty otynmen janatyn peshtiń buzylýynan tunshyqtyrǵysh gazdan ýlanǵan 59 jastaǵy áıel kóz jumyp, bes jasar bala aýrýhanaǵa jetkizildi.
Sonymen birge, Aqmola oblysynyń Atbasar qalasynda búgin túngi eki kezinde bes qabatty turǵyn úıdiń ekinshi qabatynda 4 sharshy metr jer otqa orandy. Jalyn 20 mınýttan keıin sóndirildi. Tilsiz jaýdy aýyzdyqtaýǵa QR TJM Aqmola oblysy TJD órt sóndirý qyzmetiniń 1 tehnıkasy men 5 mamany jumyldyryldy. Oqıǵa ornynan 61 jastaǵy er adamnyń múrdesi tabyldy.
