Órtti toqtatatyn bastapqy sátti jiberip aldyq – Roman Sklıar

ASTANA. QazAqparat – Premer-Mınıstrdiń birinshi orynbasary Roman Sklıar «Abaı oblysyndaǵy órt úshin kim jaýapty?» degen suraqqa jaýap berdi, dep habarlaıdy QazAqparat tilshisi.

«Rezervat Ekologııa mınıstrliginiń vedomstvosynda boldy. Astana halyqaralyq forýmy ótken kúni tústen keıin órt shyqty. Onyń aýqymyn jete baǵalaı almadyq. Sekýndyna 28 metr qatty jel men + 38 gradýs temperatýrada joǵary betkeıde órt tez tarady», - dedi Roman Sklıar Úkimet otyrysynan keıin tilshilerge bergen suhbatynda.

Sondaı-aq tilshiler vıtse-premerge órt sóndirýshiler qandaı jaǵdaıda jumys istep jatqanyn, tsısternalardy tot basqanyn, joldyń salynbaǵanyn aıtty.

«Aldaǵy ýaqytta biz sheshetin bir top másele bar. TJM men orman sharýashylyǵy tehnıkasyn jańartamyz. Biz bul máseleni qysqa merzimde sheshýdi josparlap otyrmyz.

Apat ornynda da jaǵdaıdy jetkilikti baǵalamaǵany anyq. Órt óte tez taraǵandyqtan osyndaı oqıǵa oryn aldy. Adam ólimine keletin bolsaq, bul – óte qaıǵyly jaǵdaı. Qazir prokýratýra tergeý júrgizip jatyr jáne bizge tolyq jaýap beredi. Jaǵdaı kórsetkendeı, órtti aýyzdyqtaýǵa bolatyn bastapqy sátti jiberip aldyq», - dedi Roman Sklıar.