Órtti ózi sóndirmek bolǵan aqtóbelik aýrýhanaǵa tústi
AQTÓBE. QazAqparat - Aqtóbede jeke úıdiń aýlasynan shyqqan órt baspananyń, qurylys dúkeniniń shatyryna ulasty. Órtti ózi sóndirmek bolǵan 38 jastaǵy azamat aýrýhanaǵa tústi, dep habarlaıdy QazAqparat tilshisi.
Búgin saǵat 16:29-da Aqtóbe qalasy, Jıenbaev kóshesindaǵy №44 jeke úıdiń aýlasy órtenip, órt úıdiń jáne jalǵasyp salynǵan qurylys dúkeniniń shatyryna aýysty. Órt sóndirý jáne avarııalyq-qutqarý jumystary qyzmetiniń 17 adam, 4 avtokólik jiberildi.
«Órttiń jalpy órt alańy - 200 sh.m. Órt sóndirý barysynda japsarlas salynǵan dúken jáne garaj kóligimen qutqaryldy. Óz kúshimen sóndirý barysynda qulap, jaraqat alǵan 38 jastaǵy er adam jedel járdem qyzmetkerleriniń kúshimen aýrýhanaǵa jetkizildi», - dep habarlady oblystyq tótenshe jaǵdaılar departamentiniń baspasóz qyzmeti.
Aıta keteıik, Apattar medıtsınasy ortalyǵynyń mamandary 3 adamǵa psıhologııalyq kómek kórsetti.
