Órtten zardap shekken Ulytaý fermerlerine qandaı qoldaý kórsetiledi

ULYTAÝ. QazAqparat – Qaraǵandy oblysynyń Ulytaý aýdanynda tótenshe jaǵdaıdyń aldyn alý jáne joıý boıynsha aýdandyq komıssııa jumys isteıdi. Aýdanda barlyǵy 39 jer paıdalanýshy zardap shekti. Olardyń jaıylymdary órtendi jáne bir sharýa qojalyǵy 318 malynan aıyryldy, dep habarlaıdy QazAqparat tilshisi.

Qaraǵandy oblysy ákiminiń orynbasary Serik Shaıdarov zardap shekkenderge qandaı qoldaý kórsetiletinin túsindirdi.

Ákim orynbasary fermerlermen, onyń ishinde maly qyrylǵan sharýa qojalyǵynyń basshysy Saǵyntaı Ábdibekovpen kezdesti. Táýelsiz sarapshy fermerdiń shyǵynyn baǵalaıdy. Oǵan naryq quny boıynsha ótemaqy tólenedi.

«Men mal sharýashylyǵymen 1996 jyldan beri aınalysamyn. Osyndaı jaǵdaı bizdiń fermada alǵash ret boldy. Órt tez tarady. Jel ekpindi bolyp, baǵytyn ózgertti. Biz tipti maldy qaýipsiz jerge shyǵaryp úlgermedik. Bári oıdaǵydaı bolady dep úmittenemin. Oblys ákiminiń orynbasary, jergilikti ákim, aýdan basshysy da menimen baılanysqa shyqty. Kómektesýge ýáde berdi. Qıyndyqta qaldyrmaǵandaryńyzǵa rahmet!», – deıdi Saǵyntaı Ábdibekov.

Jaıylymdyq jerler men shabyndyq jerlerden aıyrylǵan fermerlerge de qıyn jaǵdaıdan shyǵýdyń sheshimderi usynyldy.

«Qazir aýdannyń kóptegen fermerleri zardap shekken fermerlerge shóp shabý jáne mal jaıý úshin óz jerin berýdi usynady – bul bir sheshim. Ekinshisi – bir jylǵa óteýsiz memlekettik jer bólemiz. Mundaı shartty jasaýǵa Jer kodeksi múmkindik beredi», – dep túsindirdi Serik Shaıdarov.