Órtten zardap shekken Kóktóbe bókterine kóshetter otyrǵyzylady
ALMATY. QazAqparat – Almaty ákimi Baqytjan Saǵyntaev Jasyl Almaty jalpyqalalyq aktsııasy aıasynda mektepterdiń aýlalaryn kógaldandyrýǵa qatysty, dep habarlaıdy «QazAqparat» HAA tilshisi.
B.Saǵyntaev senbilikke Naýryzbaı jáne Alataý aýdandaryndaǵy №200 jáne №800 mektepterdiń oqýshylarymen birge qatysty. Bul kúni jalpy 110 mektepte joǵary synyp oqýshylary, ata-analar men pedagogtar 4360 kóshet otyrǵyzdy.
«Oqýshylarmen birge olardyń ata-analary da kelgeni qýantady. Olar qorshaǵan ortaǵa beı-jaı qaramaıtyny kórinip tur. Bizdiń úndeýimizge qosylyp, kógaldandyrý jumystaryna belsene kiristi. Olar óz aǵashtaryn sýaryp, kútip ustaıtyn bolady», - dedi shahar basshysy.
«Óz bolashaǵymyzdy týǵan qalamyzben baılanystyramyz. Almaty búgin de, keleshekte de ekologııalyq turǵyda jaıly bolyp, ǵalamshardaǵy eń jasyl qala bolyp qala bergenin qalaımyz», - dedi balalar aktsııa barysynda.
Búgin, 13 qazan kúni órtten zardap shekken Kóktóbe bókterine kóshetterdi otyrǵyzý sharasy ótedi. Buǵan deıin Mohnatka taýynyń etegine Shrenka shyrshasynyń 50 myń túp kósheti otyrǵyzylǵan bolatyn.
