Órtten qorǵaý: Aqmola oblysynda mamandar 200 myń úıdi aralaǵan
KÓKShETAÝ. QazAqparat - Aqmola oblysynda kómirtegi totyǵyn anyqtaıtyn datchıkterdiń arqasynda eki otbasy aman qaldy. Bul týraly brıfıngte óńirdiń TJD bastyǵynyń orynbasary Manarbek Shapaǵatov aıtty, dep habarlaıdy QazAqparat tilshisi.
Brıfıngte 2020-2021 jylytý kezeńiniń qorytyndylary taqylandy.
«Stepnogorsk qalasy men Astrahan aýdanynda turatyn eki otbasynda jylytý maýsymy kezinde kómirtegi totyǵynyń kontsentratsııasyn anyqtaıtyn datchıkter iske qosylyp, úı sharýashylyqtaryna kómirtegi oksıdiniń shekteýli ruqsat etilgen kontsentratsııasy týraly jedel habarlanǵany belgili boldy. Nátıjesinde ýlanýdyń aldyn-alý, sondaı-aq alty adamnyń ómirin saqtap qalý múmkin boldy», - dedi Manarbek Shapaǵatov.
Brıfıngte aıtylǵandaı 2020-2021 jyldardaǵy jylý kezeńinde órtten 10-nan astam adam kóz jumyp, jeti adam jaraqat aldy, sondaı-aq bir adam kómirtegi totyǵynan kóz jumdy.
«Jylytý maýsymy kezinde departament kún saıyn oblystyń turǵyn úı sektorynda maqsatty úgit-profılaktıkalyq jumystaryn júrgizdi. Departament qyzmetkerleri órt qaýipsizdigi salasyndaǵy jergilikti atqarýshy organdarmen, aýdıtorlyq uıymdarmen jáne 565 eriktimen birlesip, 399 573 adamdy qamtyǵan 216 156 turǵyn úıdi aralap shyqqan», – dep tolyqtyrdy Manarbek Shapaǵatov.
Osy rette, Aqmola oblysynyń TJD órttiń aldyn alýdyń mańyzdy sharty órt qaýipsizdigi erejelerin qatań saqtaý jáne oryndaý ekenin eske salady.
