Órtten keıingi úmit: «Halyk Ormany» Semeıdegi ormandy qalpyna keltirýge qalaı úles qosyp jatyr
ASTANA.KAZINFORM — Kúzgi maýsymda joba aıasynda 3 mıllıonnan astam kóshet pen jas shybyq otyrǵyzyldy. Tımýr Qulybaevtyń Halyk qaıyrymdylyq qory aǵash otyrǵyzýdy ǵana emes, orman kóshethanalaryn jańǵyrtýdy da qarjylandyryp otyr.
24 qazanda «Semeı ormany» memlekettik orman tabıǵı rezervaty aýmaǵynda «Halyk Ormany» jobasy aıasynda kúzgi aǵash otyrǵyzý naýqany ótti. Bastamany Qazaqstan Respýblıkasynyń Ekologııa jáne tabıǵı resýrstar mınıstrligi men Tımýr Qulybaevtyń Halyk qaıyrymdylyq qory birlesip júzege asyrǵan.
Ertis óńirindegi taspaly qaraǵaıly ormandar 1997 jyl men 2023 jyldar aralyǵynda órtterden edáýir zardap shekti. Tek 2023 jyldyń ózinde órt 60 myń gektardan astam aýmaqty sharpydy. Mundaı aýqymdy jerdi bir maýsymda qalpyna keltirý múmkin emes. Jas qaraǵaılardyń jersinip, tamyr jaıyp, nyǵaıýy úshin birneshe jyl qajet bolsa, tolyqqandy qaraǵaıly ormannyń qalyptasýyna ondaǵan jyl kerek.
Sondyqtan «Halyk Ormany» jobasy aǵash otyrǵyzýmen ǵana shektelmeıdi. Onyń mańyzdy bóligi — otyrǵyzylǵan aǵashtardyń ósip-jetilýine jáne olardy kútip-baptaýǵa qajetti jaǵdaı jasaý.
Orman kóshethanadan bastalady
Ormandy qalpyna keltirý jumystarynyń nátıjesi kóshetter jerge otyrǵyzylmaı turyp-aq aıqyndala bastaıdy. Ol úshin kóshetterdi durys ósirý, jetkilikti mólsherde sýarý jáne olardy qorshaǵan ortanyń jaǵdaıyna beıimdeý qajet.
Halyk qaıyrymdylyq qory Morozov orman kóshethanasyndaǵy sýarý júıesin jańǵyrtýǵa 146,5 mıllıon teńge bóldi. Jańǵyrtý jumystary aıaqtalǵannan keıin sýarylatyn aýmaqtyń kólemi 34 gektardan 46 gektarǵa deıin ulǵaıyp, ár gektardan alynatyn kóshet sany 800 myńnan 1,1 mıllıonǵa deıin artady.
Osyndaı jumystar Bókeev fılıalynda da júrgizilip jatyr. Sonymen qatar qor Kanonerka fılıalyndaǵy jylyjaı keshenin jańǵyrtýǵa qoldaý kórsetti. 2029 jyldyń sońyna deıin rezervat quramyndaǵy toǵyz kóshethananyń beseýin jańartý josparlanyp otyr.
— Tımýr Qulybaevtyń Halyk qaıyrymdylyq qory 2025 jyly «Semeı ormany» rezervatyna, Іle-Alataýy ulttyq parkine jáne Astana qalasynyń jasyl beldeýine 9 mıllıon aǵash otyrǵyzý úshin 1 mıllıard teńge bóldi. Bul baǵdarlama bes jylǵa eseptelgen. Osylaısha biz orman alqaptaryn saqtaýǵa, taza aýa men elimizdiń ekologııasyn jaqsartýǵa úles qosý arqyly bolashaq urpaqtyń densaýlyǵyna ınvestıtsııa salyp otyrmyz, — deıdi Halyk Bank basqarma tóraıymy, Halyk qaıyrymdylyq qorynyń Qamqorshylyq keńesiniń múshesi Úmit Shaıahmetova.
Ormandy qalpyna keltirý jumystarymen tanysý
Jobanyń nátıjelerin kópshilikke tanystyrý jáne jańa seriktester tartý maqsatynda qor Abaı oblysyna aqparattyq týr uıymdastyrdy. Oǵan qaıyrymdylyq qorlarynyń ókilderi, jýrnalıster men blogerlerdi qosa alǵanda, 30-dan astam adam qatysty.
— Ormandy qalpyna keltirý — bir kúnde bitetin jumys emes. Kóshetterdi otyrǵyzbas buryn olardy ósirýge qajetti jaǵdaı jasaý, al keıin turaqty túrde kútip-baptaý mańyzdy. Bul jobanyń qundylyǵy — bıznes pen qoǵamdy ortaq iske jumyldyryp, ormandy qalpyna keltirýdiń júıeli tásilin qalyptastyrýynda, — dedi ECO Network jobasynyń negizin qalaýshy Evgenıı Mýhamedjanov.
Green Eco kompanııasynyń negizin qalaýshy Roman Shnaıderman da sapaly otyrǵyzý materıalynyń jáne kóshetterdi ósirýdiń zamanaýı tehnologııalarynyń mańyzyna toqtaldy.
— Qazaqstanda sapaly otyrǵyzý materıaly men orman kóshethanalarynyń óndiristik qýaty tapshy. Sondyqtan qordyń kórsetip otyrǵan kómegi erekshe mańyzdy. «Semeı ormany» rezervatynda tabıǵı ortada ósetin kádimgi qaraǵaı ósiriledi. Zamanaýı tehnologııalar sapaly kóshetter alýǵa múmkindik beredi. Otyrǵyzar aldynda kóshetter shynyqtyrý kezeńinen ótedi. Bul ýaqytta olar qorshaǵan ortanyń jaǵdaıyna birtindep beıimdeledi, — dep atap ótti sarapshy.
Ormandy qalpyna keltirýge seriktester de atsalysyp jatyr
Jobany EUROBAK, FlyArystan, Nurlan Qapparovtyń qoǵamdyq qory jáne ROSSKO kompanııasy qoldaıdy.
Kúzgi aǵash otyrǵyzý naýqany men aqparattyq týrdy uıymdastyrý, sondaı-aq logıstıkalyq jumystarmen Qazaq Oil janarmaı quıý beketteri jelisi jáne Halyk Bank-tiń Abaı oblysyndaǵy fılıaly aınalysyp otyr.
Ormandy qalpyna keltirý jumystaryna qarapaıym turǵyndar da úles qosa alady. Halyk jáne Kaspi mobıldi qosymshalaryndaǵy QR-kodtar arqyly búginge deıin 10 mıllıon teńgeden astam qarajat jınalǵan.
Qarjylaı úles qosýǵa, qajetti resýrstar usynýǵa nemese jobaǵa óz qyzmetkerlerin tartýǵa daıyn kompanııalar men uıymdar Halyk qaıyrymdylyq qoryna habarlasa alady.
Bes jylda — 9 mıllıon aǵash
Kúzgi naýqannyń naqty nátıjesi birden belgili bolmaıdy. Otyrǵyzylǵan jas aǵashtardyń qanshasy jersinip, ósip ketkenin baǵalaý úshin ýaqyt qajet. Sondyqtan joba bir kúnde otyrǵyzylǵan aǵashtardyń sanyna ǵana emes, kóshethanalardy damytýǵa, sýarý júıesin jetildirýge jáne aǵashtardy keıinnen kútip-baptaýǵa da basymdyq beredi.
Tımýr Qulybaevtyń Halyk qaıyrymdylyq qory on jyl kóleminde jalpy somasy 100 mıllıard teńgege jýyq 200-den astam jobany júzege asyrǵan.
