Órtten 15 adamdy qutqarǵan Shyńǵys Qaıyrjanov oqýshy kezinde de erlik jasaǵan
NUR-SULTAN. QazAqparat - Elordadaǵy órtengen jataqahanadan 15 adamdy qutqaryp qalǵan Ulttyq ulannyń vzvod kapıtany Shyńǵys Qaıyrjanov «Erligi úshin» medalimen marapattaldy, dep habarlaıdy QazAqparat tilshisi.
QR Іshki ister mınıstrliginiń Otan qorǵaýshylar kúnine arnalǵan saltanatty sharasynda Ulttyq ulannyń №6636 áskerı bólim komandıri «Erligi úshin» medalimen marapattaldy. 2 mamyr kúni bolǵan órtte jaýyngerge tán jaýaptylyq tanytqan Shyńǵys Qaıyrjanov oqýshy kezinde de osyǵan uqsas erlik jasaǵan eken.
«10-synypta júrgenimde órt shyqqan úıde uıyqtap jatqan adamdardy qutqarǵan bolatynmyn. Áli esimde, úıdiń terezesinen býdaqtap tútin shyǵyp jatty. Jurttyń bári qalyń uıqyda jatqan kez bolatyn. Birden órtenip jatqan úıdiń adamdaryn oıattym. Bul jolǵy áreketimdi erlik jasadym dep aıtpas edim. Bizdiń ornymyzda kez kelgen adam osylaı isteýshi edi. Bireýge qaýip tóngenin kóre turyp, kómekke umtylmaý múmkin emes» - deıdi Shyńǵys.
Óziniń aıtýynsha, Shyńǵys Qaıyrjanov áskerıler áýletinen shyqqan.
«Ákem -zeınettegi maıor. Týǵan ápkem de maıor. Al jubaıym búgin aǵa-leıtenant shenin aldy. Ákeniń joly jalǵap osy salaǵa kelgenime 14 jyl boldy» - deıdi vzvod kapıtany.
Ol, sondaı-aq, 2 mamyr kúngi jataqhana órti kezinde qasyndaǵy eki sarbazǵa ys tıgenin aıtty.
«Eki sarbazǵa ys tıgen. Abyroı bolǵanda, aıtarlyqtaı zardap shekken joq. Ekeýi de jyldam qatarǵa qosyldy. Oqıǵanyń erteńinde aýrýhanaǵa baryp, ózimiz qutqarǵan turǵyndardyń halin surap qaıttyq. Olar da ońalyp keledi» - deıdi Shyńǵys Qaıyrjanov.
Eske sala ketsek, buǵan deıin elordadaǵy jataqhana órti kezinde júkti áıel men balalar 4-qabattan sekirgeni týraly jazǵan bolatynbyz.
